ՀՀ «Գնահատման և թեստավորման կենտրոն» ՊՈԱԿ-ի 2024 թ․ կամավոր ատեստավորման կազմակերպման և անցկացման, ներառյալ 23 առարկաներից թեստերի կազմման աշխատանքների ծախսը կազմել է 49 մլն. 500 հազար դրամ»,- տեղեկացնում է ԳԹԿ-ն՝ նշելով, որ 2024 թ. անցկացված կամավոր ատեստավորման կազմակերպման տեխնիկական կողմի ապահովման աշխատանքներն իրականացրել է ԿՏԱԿ-ը։

Ըստ պաշտոնական պատասխանի, 2025 թվականի ծախսերն անփոփոխ են։

Այս պատասխանը գրելու համար ԳԹԿ-ից պահանջվել է 28 աշխատանքային օր։

mediaforedu.am-ը ԳԹԿ-ին գրավոր հարցում էր ուղարկել հունվարի 21-ին 5 օրում պատասխան ստանալու ակնկալիքով։ Սակայն ԳԹԿ-ն հունվարի 22-ին գրել էր. «Հիմք ընդունելով «Տեղեկատվության ազատության մասին» ՀՀ օրենքի 7-րդ հոդվածի 3-րդ ենթակետը՝ տեղեկատվությունը կստանաք 2025 թ․ փետրվարի 21-ին (Ձեր դիմումը ստացվել է 2025 թ․ հունվարի 21-ին): Միարժամանակ տեղեկացնում ենք, որ տեխնիկական ծախսերի վերաբերյալ տեղեկատվության ԳԹԿ-ն չի տիրապետում»։

Սակայն, փետրվարի 21-ի փոխարեն պատասխանն ուղարկվել է փետրվարի 27-ին։

Այս հարցման անհրաժեշտությունն առաջացել էր ուսուցիչների կամավոր ատեստավորման ժամանակ ի հայտ եկած խնդրի առիթով։ Ուսուցիչները դժգոհում էին, որ չեն տեսել, թե քանի առաջադրանք է եղել ատեստավորման ժամանակ, ուստի եղել են չպատասխանված հարցեր։

Մեր գրավոր հարցումներից ու հրապարակումներից հետո ԿՏԱԿ-ը խոստացավ, որ կլուծի խնդիրը։

mediaforedu.am-ը փորձել է հստակեցնել, թե, ի վերջո, որն է այս շատ պարզ հարցը ի սկզբանե չլուծելու պատճառը։ Այդ իսկ պատճառով էլ հետաքրքրվել էինք, թե որքան գումար է ստանում ատեստավորման տեխնիկական ապահովման պատասխանատու մարմինը։

Ի դեպ, մեր հարցմանը պատասխանելու իրավասության վերաբերյալ որոշումը ԿԳՄՍ նախարարությանն է։