Լուսանկարը՝ Հայկական պետական մանկավարժական համալսարանի
www.mediaforedu.am կայքին դիմել են ուսուցիչներ՝ Արագածոտնի մարզից. խնդրում են սպառիչ տեղեկություն, թե բուհական կրթություն չունեցող ուսուցիչների համար վերապատրաստման, դրանց ժամկետների ու կարգի ի՞նչ ընթացակարգ կա, ե՞րբ կարող են դիմել՝ կամավոր ատեստավորմանը պատրաստվելու նպատակով:
Նկատի ունենալով մեզ դիմած ուսուցիչների պատրաստակամությունն ատեստավորման հարցում, նաև ՀՀ ԿԳՄՍ փոխնախարար Արաքսյա Սվաջյանի՝ 05.04.2024-ին հրապարաված հայտարարությունն, ըստ որի՝ այդ օրվանից մեկ շաբաթ առաջ անցկացվել է կամավոր ատեստավորման գործընթաց բարձրագույն կրթություն չունեցող այն ուսուցիչների համար, որոնք սեպտեմբերին անցկացված ատեստավորման ժամանակ բավարար արդյունքներ չէին ապահովել, www.mediaforedu.am կայքը օրերս դիմել էր ՀՀ ԿԳՄՍ նախարարությանը՝ խնդրելով հանգամանալից պատասխանել հետևյալ հարցերին.
- Նշված վերապատրաստմանը չմասնակցած ուսուցիչները կարո՞ղ են այժմ դիմել վերապատրաստման հարցով:
- Որտե՞ղ պիտի դիմեն, ի՞նչ կարգով:
- Վերապատրաստումներն անվճա՞ր են:
ՀՀ ԿԳՄՍ փոխնախարար Արաքսյա Սվաջյանը գրավոր պատասխանի մեջ նշել է. «Համաձայն ՀՀ կառավարության 2024 թվականի մայիսի 2-ի՝ «Հանրակրթության մասին» օրենքի 38-րդ հոդվածի 5-րդ մասի պահանջով մասնագիտական գործունեությունը դադարեցված բարձրագույն կրթություն չունեցող մանկավարժներին օժանդակության ծրագիրը հաստատելու մասին N 621-Լ որոշման՝ ծրագրի շահառու հանդիսացող անձը կարող է մասնակցել կամավոր ատեստավորման առաջիկա փուլին, ինչպես նաև կամավոր ատեստավորումը չհաղթահարած ուսուցիչների համար պետության կողմից կազմակերպվող վերապատրաստմանը: Կարևոր է ընդգծել, որ ծրագրի շահառուն կարող է դիմել նաև բարձրագույն ուսումնական հաստատություն և պահանջվող փաստաթղթերի հիման վրա կրթություն ստանալ ուսուցչի որակավորում շնորհող ինստիտուցիոնալ հավատարմագրում ունեցող բարձրագույն ուսումնական հաստատություններից մեկում՝ համապատասխան կուրսում կամ շարունակել այն՝ ընդհատված լինելու դեպքում:
Միաժամանակ նշեմ, որ առարկայական պարտադիր վերապատրաստումը իրականացվում է երաշխավորված ծրագրի հիման վրա, որի վերաբերյալ տեղեկատվությունը հրապարակվում է ՀՀ ԿԳՄՍ նախարարության պաշտոնական կայքէջում՝ համապատասխան ծրագրերը հաստատվելուց և գործընթացը մեկնարկելու մասով ժամկետները սահմանելուց հետո»:
