Հասարակագիտության 8-րդ դասարանի դասագրքի մրցույթի վերաբերյալ ՀՀ ԿԳՄՍ նախարարության դեմ ԵՊՀ դասախոս, կրթության փորձագետ Սերոբ Խաչատրյանի և փաստաբան Արսեն Թավադյանի ներկայացրած հայցով Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում հուլիսի 2-ին մեկնարկեց դատաքննությունը։ Դատավոր Վահագն Թորոսյանը հայտարարեց նախապատրաստական փուլի ավարտը և դատաքննության սկիզբը։

Դատավոր Թորոսյանը հայտարարեց, որ հունվարի 14–ին որոշում էր կայացվել ՀՀ ԿԳՄՍ նախարարությունից պահանջել դատաքննության համար անհրաժեշտ նյութերը, որոնք հուլիսի 2–ին դատարանին և հայցվոր կողմին հանձնեց նախարարության իրավաբանական վարչության ավագ իրավաբան Էդուարդ Մուրադյանը։

Դատաքննությունը նշանակվեց սեպտեմբերի 10 – ին, ժամը 16։30–ին։

Այս գործը ավելի վաղ վարչական դատարանում էր, սակայն վարչական դատարանը որոշել էր, որ գործն ընդդատյա է ընդհանուր իրավասության դատարանին։

Հայցվոր կողմը պահանջում է չեղյալ համարել 8–րդ դասարանի հասարակագիտության դասագրքի վերաբերյալ ՀՀ ԿԳՄՍ նախարարի 01.07.2024 թվականի թիվ 1169-Ա/2 հրամանը։

Նախապատմությունը

ՀՀ ԿԳՄՍ նախարարությունը 24.08.2023 թ.-ին ի շարս այլ դասագրքերի, հայտարարել էր նաև «Հասարակագիտություն 8» դասագրքի մրցույթ: Մրցույթին մասնակցել են նաև դասախոս Սերոբ Խաչատրյանը և փաստաբան Արսեն Թավադյանը, որոնց հեղինակած դասագիրքը ներկայացրել էր «Տիգրան Մեծ» հրատարակչությունը։

Դրամաշնորհային հանձնաժողովը 28.06.2024 թ. 8/2024 արձանագրության մեջ նշել է, որ մրցույթը գնահատման սանդղակին ոչ համապատասխան իրականացնելու պատճառով դասագրքերն ուղարկվել էին կրկնակի փորձաքննության:

Անցողիկ շեմը հաղթահարել են «Զանգակ-97» ՍՊԸ-ն և «Մասնակցային դպրոց» կրթական հիմնադրամը, իսկ «Տիգրան Մեծ հրատարակչություն» ՓԲԸ-ի ներկայացրած դասագիրքը չի հաղթել:

«Զանգակ-97» ՍՊԸ-ի և «Մասնակցային դպրոց» կրթական հիմնադրամի ներկայացրած դասագրքերը, ըստ հայցադիմումի, սահմանված կարգով ուղարկվել են լրամշակման: Նախարարություն են ներկայացվել վերոնշյալ դասագրքերի լրամշակված տարբերակները: Որոշվել է պայմանագիր կնքել «Զանգակ 97» ՍՊԸ-ի և «Մասնակցային դպրոց» կրթական հիմնադրամի հետ:

Բողոք

03.07.2024 թ – ին «Տիգրան Մեծ» հրատարակչությունը ԿԳՄՍ նախարարությանը ներկայացրել է բողոք` խնդրելով նշանակել «Հասարակագիտություն 8» դասագրքի նոր (կրկնակի) փորձաքննություն` ներգրավելով այլ մասնագիտացված կազմակերպություններ։ Բացի այդ, խնդրել էր տրամադրել մասնագիտական հանձնաժողովի գնահատումը, հիմնավորումները:

Նախարարությունը, ըստ հայցադիմումի, չի պատասխանել բողոքին։

09.07.2024 թ.-ին «Տիգրան Մեծ» հրատարակչությունը ներկայացրել է երկրորդ բողոքը` խնդրելով փոխել հանձնաժողովի 28.06.2024թ.-ի թիվ 8/2024 արձանագրությունը` հստակ արձանագրելով, որ «Տիգրան Մեծ հրատարակչություն» ՓԲԸ-ի դասագիրքը հաղթահարել է անցողիկ շեմը։ Հայցվորը նաև խնդրել է նշանակել «Հասարակագիտություն 8» առարկայի նոր փորձաքննություն դասագրքերի և մեթոդական ուղեցույցների գիտականության, չափորոշչի համապատասխանության և բովանդակության ստուգման նպատակով, բացի այդ՝ լրացուցիչ կարծիք ստանալու համար ներգրավել այլ մասնագետներ, մասնագիտացված կառույցներ:

Պաշտոնական առաջարկ

4.07.2024թ. – ին ՀՀ ԿԳՄՍ նախարարությունը գրավոր պատասխանել է․ «Քանի որ Ձեր դասագիրքը հաղթահարել է դասագրքի գնահատման համար սահմանված անցողիկ շեմը, հայտահրավերի պահանջի համաձայն` կարող եք ներկայացնել նախարարի երաշխավորմանը որպես ուսումնաօժանդակ նյութ` ուսումնական հաստատություններում կիրառելու նպատակով: Միաժամանակ տեղեկացնում եմ, որ արդեն իսկ սկսվել է «Հասարակագիտություն 8» առարկայի դասագրքի տպագրման գործընթացը, ուստի նպատակահարմար չէ Ձեր կողմից ներկայացված դասագիրքը ուղարկել լրացուցիչ փորձաքննության»:

Նախարարը 01.07. 2024 թ.-ին կայացրել է շուրջ 2 տարի դատարաններում վիճարկվող 1169_Ա/2 հրամանը, որով հաստատել է դրամաշնորհային հանձնաժողովի 28.06.2024 թ. թիվ 8 որոշումը:

Հայցվորները պնդում են, որ գործող օրենսդրությամբ առաջին առարկայական հանձնաժողովի եզրակացությունն անվավեր ճանաչելու ընթացակարգ նախատեսված չէ։ Նախարարությունը պարզաբանել է, որ անվավերության հիմքը գնահատման սանդղակին անհամապատասխան իրականացումն է: Սակայն, ըստ հայցվորի, դա չի կարող հանգեցնել հանձնաժողովի փոփոխությանը:

Հայցվոր կողմը երկրորդ հանձնաժողովի գնահատականները որակում է «կամայական»։

ԿԳՄՍ նախարարության դիրքորոշումն ու փաստարկները դատարանը կքննարկի դատաքննության ընթացքում։