Շոտլանդիայում աշակերտների՝ բարձրագույն մաթեմատիկայից հանձնած քննությունը դարձել է դրանց վերանայման խնդրանքով 11 հազար մարդու ստորագրահավաքի առիթ։

Աշակերտները քննությունից հետո մնացել են վշտացած, հուսահատ և անհանգստացած իրենց ապագայի համար, քանի որ քննությունը, նրանց խոսքով, «ամբողջությամբ անճանաչելի» էր այն ամենի համեմատ, ինչին պատրաստվել էին։

Ըստ BBC – ի, քննությունը վերանայելու պահանջով միջնորդագրի մեջ նշված է, որ թեստը «վատ էր ձևակերպված, անհետևողական կառուցվածք ուներ և չէր համապատասխանում նախորդ տարիների որևէ քննության ձևաչափին»։
Բացի այդ, հուշումները, թե ինչպես պետք է պատասխանել հարցին, տարբերվել են այն ձևակերպումներից, որոնց աշակերտները սովոր են եղել։ Այդ պատճառով չեն հասկացել, թե իրականում ինչ է պահանջվում իրենցից։

Նորաստեղծ քննությունների՝ «Շոտլանդական որակավորում» անվանմամբ պետական կառույցը հայտարարել է, որ բոլոր քննությունները ստուգվել են՝ համոզվելու համար, որ դրանք «հստակ, արդար և համապատասխան» են։

Առաջին տարին է, որ քննություններն անցկացնում է «Շոտլանդական որակավորում» անվանմամբ պետական կառույցը։

Քննությունների կազմակերպման նախորդ կառույցը լուծարվել էր ուսուցիչների և քաղաքական գործիչների քննադատություններից հետո՝ Covid-19 համավարակի ժամանակ քննությունների գնահատման գործընթացի, ինչպես նաև 2024 թվականի պատմության քննության կազմակերպման հետ կապված խնդիրների պատճառով։