ՅՈՒՆԵՍԿՕ-ն տեղեկացնում է, որ ՅՈՒՆԻՍԵՖ-ի հետ համատեղ գլոբալ նախաձեռնության շրջանակներում կազմակերպված չորրորդ ուսումնական այցը Ֆինլանդիա համախմբել է 13 երկրների պատվիրակների։ Նպատակն է ուսումնասիրել, թե ինչպես է Ֆինլանդիան մշակում և կիրառում հանրային թվային ուսուցման հարթակներ՝ աջակցելու աշակերտներին, ուսուցիչներին, ընտանիքներին և դպրոցներին՝ բարձր ապակենտրոնացված կրթական համակարգի պայմաններում։

Ըստ ՅՈՒՆԵՍԿՕ-ի պաշտոնական կայքում հրապարակված հաղորդագրության, 2026 թվականի ապրիլի 15-17-ը Չինաստանից, Ֆրանսիայից, Հորդանանից, Սինգապուրից, Միացյալ նահանգներից ժամանած մասնագետները Հելսինկիում ուսումնասիրել են, թե ինչպես է Ֆինլանդիան ստեղծում, պահպանում ու զարգացնում կրթությանն աջակցող թվային հանրային հարթակները։

Ֆինլանդիայում որոշումների կայացման հիմնական լիազորությունները դպրոցներինն ու ուսուցիչներինն են։ Այս ապակենտրոնացված համակարգի պայմաններում Ֆինլանդիայի կրթության նախարարության ներկայացուցիչները նշել են, որ թվային ուսուցման հարթակները նպատակ ունեն աջակցել դպրոցներին և ուսուցիչներին՝ միաժամանակ ապահովելով, որ կրթության վերահսկողությունը շարունակի մնալ հենց դպրոցների, այլ ոչ թե կենտրոնական իշխանության ձեռքում։

Ֆինլանդիան թվային ուսուցմանը մոտենում է որպես փոխկապակցված էկոհամակարգի։ Տեխնոլոգիան կրթության միայն մեկ բաղադրիչն է՝ դպրոցական սննդի, ֆիզիկական ակտիվության, դպրոց հասնելու և վերադառնալու տրանսպորտի ու կրթության այլ կարևոր բաղադրիչներից բացի։

Դպրոցներն ու ուսուցիչներն ինքնուրույն են որոշում՝ որ հարթակներն օգտագործել, ինչպես և երբ կիրառել դրանք։ Կրթական հարթակները մշակող պետական մարմիններն իրենց դերը տեսնում են ծառայություններ և տվյալներ տրամադրելու շրջանակում։ Հարթակների օգտագործումը հիմնականում կամավոր է։