«Նոյեմբերի 9-ին սկսված կամավոր ատեստավորման այս փուլն ավարտվելու է նոյեմբերի 24-ին։ «Բողոքների վերաբերյալ ամբողջական տեղեկատվություն հնարավոր կլինի տրամադրել այն վերլուծելուց և ամփոփելուց հետո», – mediaforedu.am-ի գրավոր հարցմանն ի պատասխան նշել է ԿԳՄՍ փոխնախարար Արաքսիա Սվաջյանը։

«ՀՀ կառավարության 2022 թվականի ապրիլի 28-ի N 596-Ն որոշմամբ հաստատված կարգի դրույթների համաձայն՝ ատեստավորման արդյունքի բողոքը քննելու նպատակով ատեստավորումը կազմակերպած կենտրոնի ղեկավարի հրամանով ստեղծվում է 5 անձից բաղկացած բողոքարկման հանձնաժողով, որը ձևավորվում է բողոքը մուտքագրվելուց հետո՝ 3 աշխատանքային օրվա ընթացքում»,- մանրամասնել է փոխնախարարը։

Ըստ Սվաջյանի, հանձնաժողովն իր ուսումնասիրության արդյունքների մասին գրավոր եզրակացությունը հանձնաժողովի ձևավորումից հետո 3 աշխատանքային օրվա ընթացքում ներկայացնում է բողոք բերած մասնակցին։

«Բողոքի քննարկման արդյունքի մասին որոշումն ընդունվում է բաց քվեարկությամբ՝ ձայների պարզ մեծամասնությամբ»,- գրությամբ տեղեկացրել է փոխնախարարը։

ԿԳՄՍ նախարարությունը 11.11. 2024 թ. հայտնեց, որ Գնահատման և թեստավորման կենտրոնի հոսանքազրկման պատճառով առաջացել է տեխնիկական խնդիր, որի հետևանքով կամավոր ատեստավորմանը մասնակցած ուսուցիչները չեն կարողացել ներկայացնել ատեստավորման արդյունքների բողոքարկման դիմում: Ատեստավորման արդյունքների բողոքարկման ժամկետը երկարաձգվել էր մինչև նոյեմբերի 11-ը՝ ժամը 24:00:

mediaforedu.am-ը նախարարությանը խնդրել էր նշել բողոքների թիվը, մանրամասնել որոշումների կայացման սկզբունքներն ու արդյունքները։