«Ունոն, Բենոն և ազատության թևերը» գրքի համահեղինակ, արձակագիր Արմեն Հայաստանցին այսօր հանդիպել է Երևանի N 35 դպրոցի աշակերտներին: Երեկ նա եղել է Երևանի N 196, N 168 դպրոցներում:

Գրքի համահեղինակ Արմեն Հայաստանցին www.mediaforedu.am-ին տեղեկացրեց, որ ամռանը Կրթության զարգացման և նորարարությունների ազգային կենտրոնի (ԿԶՆԱԿ)-ի հետ համագործակցությամբ հանդիպել է «Գլոբալ բրիջ» մասնավոր դպրոցի աշակերտներին, ՔՈԱՖ կենտրոն այցելող երեխաներին, Լոռվա Դեբեդ համայնքի դպրոցի աշակերտներին:

Համահեղինակը 100 դպրոցների գրադարաններին հանձնում է գրքեր՝ դասարանական ընթերցումների կազմակերպման նպատակով:

ԿԶՆԱԿ-ը տեղեկացնում է, որ «Ընթերցանությունը տարրական դպրոցում» ծրագրով Երևանի երեք դպրոցներում փորձարկվում է «Ունոն, Բենոն և ազատության թևերը» գրքի ուսումնասիրման նպատակով ստեղծված ուսուցչի ուղեցույցը: Այն, ըստ ԿԶՆԱԿ-ի, մշակվել է 100 ուսուցչի հետ քննարկումներից հետո:

Արձակագիր Արմեն Հայաստանցու և պատկերազարդող Հարություն Թումաղյանի հեղինակած գրքի առանցքային թեման ազատությունն է: Ունոն ու Բենոն միասին գնում են թանգարան, որտեղ Ունոն կորցնում է Բենոյին: Ընկերոջ փնտրտուքը հյուսվում է ջունգլիների, Եգիպտոսի, միջնադարյան ժամանակաշրջանի վերաբերյալ հետաքրքիր պատմություններով: