Հնդկաստանի մայրաքաղաք Դելիում օդի աղտոտվածության խիստ բարձր մակարդակի և դրա դեմ կիրառվող ամենախիստ միջոցառումների փուլը պատճառ է դարձել, որ փոխվի դպրոցների աշխատանքային ռեժիմը։ Դելիում դադարեցվել են մինչև 5-րդ դասարանի աշակերտների առկա դասերը․ ուսուցումն իրականացվելու է ամբողջությամբ առցանց ձևաչափով, իսկ 6 – 11-րդ դասարանների համար սահմանվել է հիբրիդային ուսուցում՝ առցանց և առկա դասերի համադրությամբ։

Դելիի կրթության վարչությունը դպրոցներին հորդորել է հնարավորինս նվազեցնել աշակերտների ֆիզիկական ներկայությունը և ուսումնական գործընթացը կազմակերպել համակցված ձևաչափով։

Նման սահմանափակումներ են կիրառվել նաև Դելիին հարակից Նոյդա և Ղազիաբադ քաղաքներում։ Գաութամ Բուդհ Նագարի և Ղազիաբադի դպրոցների տեսչությունները հայտնել են, որ դեկտեմբերի 14-ից նախակրթարանից մինչև 5-րդ դասարան բոլոր պարապմունքները կանցկացվեն առցանց՝ մինչև հետագա ծանուցումը, իսկ 6-9-րդ և 11-րդ դասարանների համար ուսուցումը կկազմակերպվի հիբրիդային ձևաչափով։

Որոշումները պայմանավորված են օդի աղտոտվածության պայմաններում մարդկանց առողջությանը սպառնացող վտանգներով։ Մինչ այդ Դելին օրը սկսել է խիտ թունավոր մշուշի պայմաններում․ առավոտյան օդի որակի ինդեքսը գերազանցել է 400-ը՝ քաղաքը պահելով «ծայրահեղ վտանգավոր» աղտոտվածության մակարդակում։