ԱՄՆ Կրթության դեպարտամենտը բախվում է նոր խնդիրների. աշխատակիցները վերադառնում են գրասենյակ՝ նախագահ Թրամփի հրահանգի համաձայն, սակայն, ըստ Associated Press լրատվական գործակալության, դեպարտամենտի բազմաթիվ գրասենյակներ դեռ վերանորոգման փուլում են, և աշխատակիցների համար բավարար պայմաններ չկան։ Շատերն աշխատում են առանց իրենց հատկացված աշխատասեղանների: Սա, ըստ գործակալության, առաջացնում է դժգոհություն և լարվածություն։

Politico-ի տվյալներով՝ Իլոն Մասկը, որը ղեկավարում է առավարության արդյունավետության վարչությունը, խստորեն հետևում է, որ բոլոր աշխատակիցները ներկայանան գրասենյակ։

Մասկը նախազգուշացրել է, որ հեռավար աշխատող դաշնային ծառայողները կուղարկվեն վարչական արձակուրդի, եթե չգնան իրենց աշխատավայր:

Բացի այդ, ըստ նոր կարգի, բոլոր աշխատակիցները պետք է ամեն շաբաթ հաշվետվություն ներկայացնեն իրենց կատարած աշխատանքի մասին, հակառակ դեպքում դա կդիտվի որպես աշխատանքից հեռացում՝ կամավոր հիմունքներով։

Կրթական ոլորտի մասնագետները փորձում են հասկանալ՝ ինչ ազդեցություն կունենան այս փոփոխությունները հանրային կրթության համակարգի վրա։