Լուսանկարը՝ mezha.net կայքից
Եվրամիության ընդլայնման հանձնակատար Մարտա Կոսը այցելել է Ուկրաինայի Ուժգորոդ քաղաք՝ Գաբոր Դոյկոյի անվան լիցեյ, որտեղ ուսուցումը իրականացվում է հունգարերեն: Ապա նա շրջայց է կատարել Ուժգորոդի թիվ 4 լիցեյում, որտեղ ուսուցումը կազմակերպվում է սլովակերեն։
Մարտա Կոսը հետաքրքրվել է ուսումնական պայմաններով, հանդիպել կրթական հաստատությունների ղեկավարությանը՝ քննարկելով, թե ինչպես են պահպանվում ուսանողների լեզվական և մշակութային իրավունքները։ Հանձնակատարը նշել է, որ կրթական փորձառության գնահատումը կօգնի հասկանալ, թե ինչպես է Ուկրաինան շարժվում դեպի եվրոպական չափանիշներ կրթության և ազգային համայնքների իրավունքների ապահովման ոլորտում, որոնք ԵՄ անդամակցության հիմնական պայմաններից են։
Եվրոպական հանձնակատարի խոսքով՝ Ուժգորոդից հետո նրա ուղևորությունը կշարունակվի Լվովում և Կիևում, որտեղ ևս կուսումնասիրի կրթական հարցերը և Ուկրաինայի աջակցությունը եվրոպական ինտեգրման գործընթացում։
Կոսը ներկայացրել է կրթության բարեփոխումների և ազգային համայնքների իրավունքների ուժեղացման հետագա քայլերի առաջնահերթությունները՝ ԵՄ անդամակցության համատեքստում։
