Շանհայում անցկացված Կրթական հետազոտությունների 10-րդ ֆորումի շրջանակում հռչակվել են կրթական հետազոտությունների մեթոդաբանության նորարար հինգ մրցանակակիր-գիտնականները։ Տեղեկացնում է China Daily պարբերականը։

Սթիվեն Բոլը, Անետ Լարոն, Հերբ Մարշը, Մին Վեյֆանը և Անդրեաս Շլայխերը աշխարհում առաջին նման մրցանակ ստացողներն են։

Մրցանակաբաշխությունը նախաձեռնել է Շանհայի արևելաչինական համալսարանի կրթության ֆակուլտետը՝ նպատակ ունենալով ճանաչել կրթական հետազոտությունների մեթոդաբանության ոլորտում նորարարական մոտեցումները և խթանել միջազգային համագործակցությունը:

Հերբ Մարշը (Ավստրալիայի Կաթոլիկ համալսարանի հոգեբանության և կրթության ինստիտուտի պրոֆեսոր) մրցանակի է արժանացել քանակական հետազոտական մեթոդների ոլորտում իր նշանակալի ներդրումների համար, ներառյալ կառուցվածքային հավասարումների մոդելավորումը, գործոնային վերլուծությունն ու բազմաստիճան մոդելավորումը։ Նրա «Մեծ ձուկ՝ փոքր լճակում» տեսությունը մեծ ազդեցություն է ունեցել ժամանակակից կրթական հոգեբանության վրա։

Մին Վեյֆանը (Պեկինի համալսարանի Կրթության բարձրագույն դպրոցի պատվավոր դեկան) պարգևատրվել է կրթության տնտեսագիտության ոլորտում իր ներդրումների համար։ Նա համադրել է տնտեսագիտական վերլուծություններն ու Չինաստանի բարձրագույն կրթության խնդիրները՝ նպաստելով կրթական տնտեսագիտության զարգացմանն ու կրթական քաղաքականության ձևավորմանը։

Սթիվեն Բոլը և Անդրեաս Շլայխերը, ինչպես նաև Անետ Լարոն, մրցանակի են արժանացել կրթական հետազոտությունների մեթոդաբանության ոլորտում իրենց նորարարական մոտեցումների և համաշխարհային կրթական հետազոտությունների զարգացմանը նպաստելու համար:

Միջոցառման կազմակերպիչները շեշտել են, որ մեթոդաբանական նորարարությունները կարևոր են կրթության զարգացման, ինչպես նաև կրթական քաղաքականությունների միջազգային մակարդակում արդյունավետ ձևավորման համար:

«Չինաստանում կրթական հետազոտությունները մեծապես կենտրոնացած են ազգային խնդիրների լուծման վրա՝ միաժամանակ ներգրավելով միջազգային փորձն ու մեթոդները»- հայտարարել է մրցանակաբաշխությունը նախաձեռնած համալսարանի կրթության ֆակուլտետի ղեկավար Յուան Չժենգոուն։