Այսօր լրանում է 25 -րդ տարին, ինչ նշվում է Մայրենի լեզվի օրը:

UNESCO-ն վերջին զեկույցով անդրադառնում է բազմալեզու կրթությանը: Ընդգծվում է ուսումնական հաստատություններում նաև փախստական, տեղահանված երեխաների մայրենի լեզվով կրթության կազմակերպման անհրաժեշտությունը: Այս մոտեցումը գործում է աշխարհի մի շարք երկրներում: Ամենավառ դրսևորումը Շվեդիայում է: Շվեդիան, ըստ զեկույցով փաստարկված տվյալների (OECD Sweden report), հատկացնում է ՀՆԱ-ի մոտ 7․3 %-ը՝ կենտրոնանալով հավասար հասանելիության, ներառականության և բազմալեզու աջակցության վրա։

Ըստ UNESCO-ի՝ երեկ հրապարակած զեկույցի, այսօր մարդկության (միջին հաշվով) 40 %-ը զուրկ է կրթությունից՝ կապված մայրենի լեզվի հասանելիության և դասավանդվող օտար լեզվին ամբողջությամբ չտիրապետելու խնդրի հետ: Իսկ ցածր ու միջին եկամուտ ունեցող երկրներում 90 %-ն է բախվում այս խնդրին:

Ընդհանուր առմամբ, 31 միլիոն մարդու համար է խնդիր մայրենի լեզվով որակյալ կրթության բացակայությունը:

Զեկույցը կրթության նախարարություններին հղած ուղերձում հուշում է, թե ինչպիսի մոտեցում է պետք ցուցաբերել լեզվի խնդիր ունեցող երեխաների դեպքում:

Երեկ և այսօր այդ մոտեցումները հրապարակվում են Փարիզում՝ աշխարհի շատ երկրների կրթության նախարարների ներկայությամբ:

Իսկ Հայաստանի ԿԳՄՍ նախարարը տոնի կապակցությամբ Գ. Սունդուկյանի անվան ազգային ակադեմիական թատրոնում մասնակցել է ՀՀ-ում բնակվող ազգային փոքրամասնությունների մշակույթին ու լեզվին նվիրված էքսպոյին, որի ընթացքում ցուցադրվել են դպրոցականների նախագծային աշխատանքները: