Լուսանկարը՝ cbc․ca-ի
Կանադայի Օնտարիո նահանգի կրթության նախարար Փոլ Կալանդրան հայտնել է, որ ուսանողների ստանդարտացված թեստերի արդյունքները նախատեսվում է հրապարակել հաջորդ շաբաթ․ դրանք սովորաբար հրապարակվում են աշնան սկզբին, սակայն այս տարի նախարարությունը գործընթացը հետաձգել է՝ նշելով, որ անհրաժեշտ է եղել «խոր ուսումնասիրություն» կատարել։
Ընդդիմությունը քննադատել է նախարարին՝ պնդելով, որ հետաձգման համար պատճառ չի եղել։ Լիբերալների առաջնորդ Ջոն Ֆրեյզերը խորհրդարանում ընդգծել է, որ ոչինչ չի խանգարել նախարարությանը ժամանակին հրապարակել արդյունքները։ «Կարծում եմ՝ վարչապետը պետք է նման նախարար ունենա, որը միաժամանակ կարող է և՛ քայլել, և ծամոն ծամել, որովհետև նրան ոչինչ չէր խանգարում այդ արդյունքները փոխանցել երեխաներին, ուսուցիչներին, ծնողներին»։
Կալանդրան չի հստակեցրել՝ արդյո՞ք անցած ուսումնական տարվա արդյունքները մտահոգիչ են եղել։
Վերջին տարիներին նահանգի կառավարությունը փորձում է բարձրացնել մաթեմատիկայի մակարդակը։ Նախորդ տարվա տվյալները ցույց են տվել, որ մաթեմատիկայի միավորները մնացել են ցածր, մինչդեռ 3-րդ և 6-րդ դասարանների ընթերցանության ու գրավորի արդյունքները նվազել են։
Կանաչների առաջնորդ Մայք Շրայները հայտարարել է, որ Կրթության որակի և հաշվետվողականության գրասենյակի վրա ծախսվող փողը նպատակահարմար կլիներ ուղղել դպրոցներին։
Նոր դեմոկրատական կուսակցության առաջնորդ Մարիտ Սթայլսը, չնայած տարիներ առաջ հանդես էր եկել Կրթության որակի և հաշվետվողականության գրասենյակի թեստավորումը վերացնելու առաջարկով, նշել է, որ կառույցի աշխատանքը որոշակի արժեք ունի, սակայն այն դարձել է քաղաքականացված։
Օնտարիոյի ուսուցիչների ֆեդերացիայի փոխնախագահ Շերլի Բելն իր հերթին հարցեր է բարձրացրել ուշացման վերաբերյալ՝ ընդգծելով, որ Կրթության որակի և հաշվետվողականության գրասենյակի թեստավորումը տալիս է միայն «մեկ օրվա պատկեր»։
