Մեծ Բրիտանայի Բարձր դատարանը մերժել է մասնավոր դպրոցների ընտանիքների հայցը՝ ընդդեմ կառավարության՝ դպրոցական վարձավճարների վրա 20% ավելացված արժեքի հարկ (ԱԱՀ) կիրառելու որոշման։

Դատարանը որոշել է, որ հարկային քաղաքականությունը համաչափ է՝ պետական դպրոցների ֆինանսավորումը բարելավելու նպատակով։ Ըստ կառավարական հաշվարկների, նման քաղաքականության շնորհիվ տարեկան մոտ 2 միլիարդ դոլար եկամուտ կարող է ներմուծվել բյուջե։

Ծնողները 3 տարբեր հայցերով դատարան էին դիմել՝ պնդելով, որ նոր հարկը խախտում է կրթության իրավունքը, հատկապես նրանց համար, որոնք ունեն հատուկ կրթական կարիքներ կամ հաճախում են հավատքի և միայն աղջիկների դպրոցներ։ Հայցի պահանջն էր, որ դատարանը կրթական քաղաքականությունը դիտարկի մարդու իրավունքների համատեքստում։

Հայցերը ներկայացրել էր մարդու իրավունքների առաջատար փաստաբան լորդ Փաննիկի ղեկավարությամբ աշխատող իրավաբանների խումբը։

Անկախ դպրոցների խորհուրդը (ISC) նշել է, որ իրենց մտահոգությունը մնում է՝ կապված այդ քաղաքականության բացասական հետևանքների հետ։ Խորհուրդը շարունակում է աշխատանքը՝ ապահովելու, որ կառավարությունը վերանայի կրթության ոլորտում այդ փոփոխությունների խնդիրն ու նորովի գնահատի դրա ազդեցությունը։