«Ողջ Եվրոպան պետք է հետևի Դանիայի օրինակին` արգելելով բջջային հեռախոսները դպրոցներում, որպեսզի դադարեցնի «գայթակղությունը թվային հարթակներում», – հայտարարել է Դանիայի բարեկեցության հանձնաժողովի նախագահ Ռասմուս Մեյերը։

Guardian-ը մեջբերում է Մեյերի խոսքն, ըստ որի` դպրոցներում բջջային հեռախոսների արգելքը երեխաներին «փրկել է» առցանց կյանքից՝ նրանց վերադարձնելով կյանքի բնականոն հուն։

Անցյալ ամիս հրապարակված հանձնաժողովի զեկույցը ահազանգում էր երեխաների և երիտասարդների կյանքի թվայնացման վտանգների մասին։

35 առաջարկությունների թվում էր օրենսդրության փոփոխությունը` դպրոցներում հեռախոսների խիստ արգելք սահմանելու մասին։ Հանձնաժողովը նաև նշել էր, որ մինչև 13 տարեկան երեխաները չպետք է ունենան սեփական սմարթֆոն կամ պլանշետ:

«Այդ զարգացումներն այնքան արագ են տեղի ունեցել, որ մենք՝ որպես հասարակություն, հետ ենք մնացել։ Սա մեր փորձն է՝ առաջ անցնել ներկա իրավիճակում և հետ մղել երեխաների կյանքի այս առևտրային թվայնացումը», – ասել է Մեյերն ու ընդգծել, որ այս նախաձեռնության նպատակն է երեխաներին տեխնոլոգիաներից պաշտպանելը:

Հանձնաժողովն անհանգստացնող է որակել փաստը, որ Դանիայի երիտասարդների 94%-ն ունեցել է սոցիալական մեդիայի պրոֆիլ մինչև 13 տարեկան դառնալը, չնայած դա սոցիալական մեդիա հարթակների համար նվազագույն տարիքն է, և որ 9-14 տարեկաններն օրական միջինը երեք ժամ են ծախսում TikTok-ում և YouTube-ում: