Տեխնոլոգիական աշխարհի առաջատարներից Շվեդիայում կրթական քաղաքականությունն ուշագրավ շրջադարձ է արձանագրում․ թվային տեխնոլոգիաներից անցում դեպի ավանդական ուսուցման մեթոդներ։

Կառավարությունը փորձում է մեծացնել գրքերի, թուղթ– գրիչի օգտագործումը դպրոցներում։ Նպատակն է բարձրացնել աշակերտների ընթերցանության և գրելու հմտությունները, որոնք վերջին տարիներին նվազել են։

Սյս մոտեցումը քննադատում են տեխնոլոգիական ընկերությունները, նաև՝ որոշ ուսուցիչներ ու գիտնականներ։

Ստոկհոլմից ոչ հեռու՝ Նակկա քաղաքի ավագ դպրոցում աշակերտները կրկին սկսել են ավելի հաճախ օգտագործել գրքեր և տպված նյութեր։

Շվեդիան կրթության ոլորտում թվայնացման գործընթացը սկսեց 2000-ականների վերջից։ 2010-ականներից դպրոցներում լայնորեն կիրառվում էին նոթբուքերը, և 2015-ին աշակերտների մոտ 80% – ն ուներ անձնական թվային սարք։ 2019 – ին նույնիսկ մանկապարտեզներում պարտադիր դարձավ պլանշետների օգտագործումը։

Սակայն 2022-ին իշխանության եկած աջակողմյան կառավարությունը որոշեց փոխել այս մոտեցումը։ Կրթության ոլորտի պատասխանատուներից Յոար Ֆորսելը նշել է, որ ցանկանում են հնարավորինս նվազեցնել էկրանների օգտագործումը, հատկապես փոքր տարիքի երեխաների համար։

Կառավարությունը հաճախ օգտագործում է «էկրանից դեպի թղթապանակ» կարգախոսը՝ ընդգծելով, որ էկրաններից զերծ ուսուցումը երեխաներին օգնում է ավելի լավ կենտրոնանալ և զարգացնել գրավոր ու ընթերցանության հմտությունները։

2025-ից սկսած՝ մանկապարտեզներում այլևս պարտադիր չէ թվային սարքերի օգտագործումը, իսկ մինչև 2 տարեկան երեխաներին պլանշետներ չեն տրամադրվում։ Բացի այդ, այս տարվա ընթացքում ուժի մեջ կմտնի դպրոցներում բջջային հեռախոսների օգտագործման արգելքը՝ նույնիսկ ուսումնական նպատակներով։