Լուսանկարը՝ Georgia Today կայքից
Վրաստանի կրթության, գիտության և երիտասարդության նախարար Գիվի Միկանաձեն հայտարարել է, որ երկրում մասնավոր դասավանդումը օրենքով կարգավորվող գործունեություն չէ և չի պահանջում որևէ պաշտոնական թույլտվություն։ Նրա խոսքով՝ դա մասնավոր պայմանավորվածություն է անհատների միջև, որն իրականացվում է աշխատանքային ժամերից դուրս և զերծ է իրավական կարգավորումից։ Տեղեկացնում է Georgia today կայքը։
Նախարարը շրջանցել է հարցը, թե ինչու պետք է դպրոցականներն ունենան կրկնուսույցի կարիք։
«Կրկնուսուցումը համաձայնություն է անհատների միջև՝ իրենց հիմնական աշխատանքային պարտականություններից դուրս որոշակի գործունեություն իրականացնելու վերաբերյալ։ Այդ պատճառով այն չի ենթարկվում իրավական կարգավորման», – նշել է Միկանաձեն։
Նախարարության պարզաբանմամբ՝ եթե խոսքը վերաբերում է ուսուցման կենտրոններին կամ հաստատություններին, ապա այդտեղ աշխատող ուսուցիչները պետք է հիմնական գործատուից ստանան թույլտվություն՝ համոզվելու համար, որ լրացուցիչ աշխատանքը չի խանգարի հիմնական պարտականությունների կատարմանը։
«Եթե ուսուցիչը լիարժեք կատարում է իր հիմնական աշխատանքը և ունի լրացուցիչ գործունեության համար անհրաժեշտ ժամանակ և ռեսուրս, կրթական հաստատության տնօրենը կարող է համապատասխան թույլտվություն տալ։ Միակ պայմանը՝ աշխատանքային ժամերը չպետք է համընկնեն», – ասել է նախարարը։
