Հյուսիսային Իռլանդիայի կառավարությունը որոշել է հատկացնել 31 միլիոն ֆունտ ստեռլինգ (մոտ 39 միլիոն ԱՄՆ դոլար) ուսուցիչների և դպրոցների ղեկավարների մասնագիտական զարգացմանն աջակցելու համար։ Նորաստեղծ հիմնադրամը երեք տարում երկրի բոլոր դպրոցներին պետք է փոխանցի ֆինանսական միջոցներ՝ բարձրորակ մասնագիտական ուսուցման նպատակով։

Ֆինանսավորումը Կրթության դեպարտամենտի՝ 2025 թվականի մարտին ներկայացված TransformED ռազմավարության էական բաղադրիչ է, որի նպատակն է վերափոխել կրթական համակարգը՝ հիմնվելով գերազանցության, արդարության և արդյունավետության սկզբունքների վրա։

Հյուսիսային Իռլանդիայի կրթության նախարար Փոլ Գիվանը ասել է. «Ուսուցիչները մեր կրթական համակարգի ողնաշարն են, և նրանց մասնագիտական աճն առանցքային է յուրաքանչյուր երեխայի կարողությունները լիարժեք բացահայտելու համար։ Կրթության որակը չի կարող գերազանցել ուսուցիչների որակը։ Այս ներդրումը նրանց կօգնի մասնագիտական զարգացման բոլոր փուլերում»։

Հիմնադրամի միջոցով կֆինանսավորվեն դասընթացների մասնակցությունը, փոխարինող ուսուցիչների վճարը՝ հիմնական ուսուցիչների ուսուցման ժամանակ ազատելու համար, դպրոցում կամ արտաքին մասնագետների վերապատրաստման ծրագրերը,մենթորությունը և խորհրդատվությունը,մասնակցությունը մասնագիտական ուսուցման ցանցերում։

Նախարարը շեշտել է. «Այս նախաձեռնությունը միտված է ձևավորելու շարունակական ու ամբողջ կարիերայի ընթացքում մասնագիտական ուսուցման մշակույթ։ TransformED ռազմավարությունը ճանաչում է, որ երբ ուսուցիչները զարգացնում են իրենց կարողությունները, աշակերտներն են շահում։ TPL հիմնադրամը դպրոցներին հնարավորություն կտա ընտրել այնպիսի ուսուցման ձևաչափեր, որոնք լավագույնս կհամապատասխանեն իրենց և իրենց աշակերտների կարիքներին։ Համոզված եմ՝ այս ներդրումը երկարաժամկետ դրական ազդեցություն կունենա ամբողջ կրթական համակարգի վրա»։