Լուսանկարը՝ ԿԳՄՍ նախարարության էջից
ՀՀ կրթության, գիտության, մշակույթի և սպորտի նախարար Ժաննա Անդրեասյանը ՀՀ պետական բարձրագույն ուսումնական հաստատությունների ռեկտորների հետ հանդիպմանը քննարկել է Ակադեմիական քաղաքի, խոշորացման վերաբերյալ հարցեր։ Տեղեկացնում է ԿԳՄՍ նախարարությունը։
ԿԳՄՍ նախարար Ժաննա Անդրեասյանն ընդգծել է՝ գործընթացը բավականին բարդ է և բազմաշերտ, բայց դրա շրջանակում ցանկացած քայլ կատարվում է բարձրագույն ուսումնական հաստատությունների անմիջական ներգրավմամբ:
Ըստ ԿԳՄՍ նախարարության, Ժաննա Անդրեասյանն ասել է․ «Յուրաքանչյուր բուհի հետ կունենանք առանձին քննարկում՝ ներկայացնելով նախագիծը: Սա բարդ և երկարատև գործընթաց է, որը չի կարող արդյունավետ իրականացվել՝ առանց բուհերի հետ համագործակցված աշխատանքի»:
Նախարարը նաև նշել է․ «Կարևորում ենք բուհական հանրույթի հետ արդյունավետ համագործակցությունը և կարծում ենք՝ երկխոսությունը պետք է հանգեցնի այնպիսի մի իրավիճակի, որ «Ակադեմիական քաղաք» ծրագիրը հանրային ընկալումներում դիտարկվի ոչ միայն Կառավարության կամ նախարարության, այլև առաջին հերթին բուհերի ծրագիր: Ծրագրի իրական պտուղները տեսանելի են դառնալու ապագայում. դրա իրական շահառուներն այսօր դեռ դպրոցում սովորող աշակերտներն են, որոնց համար մենք ցանկանում ենք ապահովել որակյալ և մրցունակ բարձրագույն կրթության հնարավորություն»։
Ակադեմիական քաղաքի վերաբերյալ կառավարության նախաձեռնած ծրագրի դեմ վերջին օրերին բողոքի ակցիա էին կազմակերպել Երևանի Կոմիտասի անվան պետական կոնսերվատորիայի ուսանողներն ու դասախոսները՝ պահանջելով չեղյալ համարել նաև Կոնսերվատորիան ակադեմիական քաղաք տեղափոխելու գաղափարից։
Կառավարությունը ակադեմիական քաղաքի հայեցակարգը հաստատել էր անցյալ հոկտեմբերին։
