Երևանի քաղաքապետարանը սահմանել է դպրոցներում սմարթֆոնների գործունեությունը սահմանափակելու կարգը։ Այն պարտադիր է Երևանի համայնքային 151 դպրոցներից 143-ում։ Սմարթֆոնների կիրառության սահմանափակումը պայմանավորված է երեխաների առողջությամբ, անվտանգությամբ։

Սեպտեմբերի 29-ին բջջային հեռախոսների օգտագործման սահմանափակման և արգելքի թեման քննարկվել էր Երևանի քաղաքապետարանի գործակարգավարական խորհրդակցության ժամանակ։

Քաղաքապետ Տիգրան Ավինյանը հանձնարարել էր նախ ստանալ դպրոցների կարծիքները և ամփոփելուց հետո նոր որոշումը ուղարկել տնօրեններին․ «Ես վստահ եմ, որ դպրոցականները սկզբում որոշակիորեն կընդվզեն այս որոշման դեմ, բայց կրթության որակի, առօրյայի և նույնիսկ երջանկության վրա այս արգելքները դրական ազդեցություն կունենան»,- ասել էր քաղաքապետը։

mediaforedu.am-ը հետևում է աշխարհում այս ուղղությամբ իրականացվող նախաձեռնություններին։ Դրանց վերաբերյալ հրապարակումների ընդհանուր հղումը` այստեղ։