Մեծ Բրիտանիայում հատուկ կարիքներ ունեցող 5 տարեկան երեխաները զարգացման հիմնական ցուցանիշներով 20 ամսով հետ են մնում իրենց հասակակիցներից։ Նշված է Կրթական քաղաքականության ինստիտուտ զեկույցում։

Ըստ զեկույցի՝ այս տարի արձանագրված տարբերությունը առավելագույնն է վերջին տասնամյակի ընթացքում։

Կրթական քաղաքականության ինստիտուտի գործադիր տնօրեն Նաթալի Պերերան զգուշացրել է, որ առանց շտապ և համակարգված միջամտության՝ այս երեխաների խնդիրներն ավելի կխորանան՝ սահմանափակելով նրանց կյանքի հնարավորությունները։

Կրթության ոլորտի պատասխանատուները նշել են, որ 2026 թվականից նախատեսվում է շուրջ 9 միլիարդ ֆունտ ներդրում վաղ մանկական կրթության ոլորտում։ Նախատեսվում է նաև հատուկ կարիք ունեցողների աջակցության ֆինանսավորման 50 տոկոսով ավելացում և մանկապարտեզների հասանելիության ընդլայնում՝ մինչև 30 ժամ անվճար մասնակցություն աշխատող ծնողների երեխաների համար։

Փորձագետները զգուշացնում են՝ այդ միջոցառումներն անհրաժեշտ են, բայց դեռ բավարար չեն։ Քննադատներն ընդգծում են, որ առանց համակարգային բարեփոխումների և ֆինանսավորման երկարաժամկետ ռազմավարության՝ հատուկ կարիք ունեցող երեխաները շարունակելու են հետ մնալ՝ հավասար կրթական հնարավորություն ունենալու իրավունքի խախտման վտանգով։