Բրիտանիայի Դերբիշիրի շրջանի հատուկ կրթական հաստատությունում անցկացվում է դպրոցական ուրբաթօրյա փառատոն՝ բացառիկ կրթական ծրագիր, որը ծնողներին թույլ է տալիս երեխաներին բերել այստեղ առանց տուգանքի վախի։

10 տարի առաջ է մեկնարկ տրվել այս նախաձեռնությանը, որը յուրահատուկ կերպով համադրում է ուսումնական ծրագիրը և ստեղծարարությունը։

Guardian պարբերականը փաստում է, որ այս մոդելի շնորհիվ նկատելի է երեխաների ընդգծված առաջադիմությունը մաթեմատիկայի դասին, անգլերենի և երաժշտության ժամերին։ Հատկանշական է, որ ֆիզկուլտուրայի դասերին մարզվում են Derby County ֆուտբոլային ակումբի մարզիչների և բրիտանացի երկրպագուների շրջանում հայտնի Mr Motivator-ի հետ։

«Մենք հետևում ենք ազգային ուսումնական ծրագրին, դասագրքերին ու պլաններին, պարզապես ավելի ստեղծագործ մոտեցմամբ», — ասել է դպրոցի հատուկ կարիքների համակարգող Դեյվ Հենքոքսը։

Այս մոդելի գլխավոր առաքելությունն է՝ ապահովել, որ կրթությունը հասանելի լինի բոլոր երեխաների համար, անկախ նրանց կարիքներից։ Միջինի համեմատ եռապատիկ աջակցություն է տրամադրվել հատուկ կարիք ունեցող երեխաներին։

«Մենք երբեք չենք մերժել որևէ երեխայի։ Հավանաբար սա ամենաներառական դպրոցն է ողջ երկրում», — ընդգծել է դպրոցի համակարգողը։

Փառատոնային դպրոցի գաղափարը ծնվել է այն ժամանակ, երբ խստացան դպրոցական բացակայությունների վերաբերյալ օրենքները։ Ծնողները վախենում էին, որ երկար բացակայությունների դեպքում կարող են տուգանվել։

Ծնողները նախապես գրանցում են իրենց երեխաներին դպրոցի համար, և կազմակերպիչները կապվում են երեխայի հիմնական դպրոցի հետ՝ ապահովելու, որ օրը դիտարկվի որպես արտադասարանային ուսումնական գործունեություն՝ որպես «դպրոցական արշավ»։

Այս դպրոցը ոչ միայն կրթական ծրագիր է, այլև օրինակ է, թե ինչպես կարելի է կրթությունը դարձնել գրավիչ, ներառական ու ոգեշնչող։