Լուսանկարը՝ ՄՀԿ-ի
«Ճապոնացիները ինչպե՞ս ոտքի հանեցին իրենց դպրոցը: Ուսուցչին տվեցին նախագահից բարձր իրավունքներ և բարձր աշխատավարձ»: mediaforedu.am-ի հետ զրույցում ասաց ԵՊՀ փիլիսոփայության և հոգեբանության ֆակուլտետի փիլիսոփայության պատմության, տեսության և տրամաբանության ամբիոնի դոցենտ Ատոմ Վարդումյանը:
Նա, անդրադառնալով Հայաստանում ուսուցիչների աշխատավարձերի բարձրացմանը, դժգոհեց, որ այդ աշխատավարձը «ուսուցիչների քթից են հանում թղթավարությամբ»:
Դոցենտի խոսքով, «այսօր ուսուցիչները չեն ուզում դպրոցում աշխատել, որովհետև նրանք պատրաստ չեն հա՛մ տետրերը ստուգել, հա՛մ դաս անել, հա՛մ էլ ամենօրյա պլան գրել ու ինչ-ինչ թղթեր լրացնել: Երևի «աշխատանք» անելու համար են հնարում այդ կարգերն ու ուղարկում դպրոցներ՝ պահանջելով՝ լրացրե՛ք՝ վերադարձրե՛ք, որ ներկայացնենք վերադասին, թե նայեք՝ այսքան աշխատանք ենք կատարում: Եվ այդ ամբողջը մնում է ուսուցիչների ուսերին»,- ասաց Ատոմ Վարդումյանը: ԵՊՀ դասախոսը կոչ արեց պաշտպանել ուսուցչի վարկը:
