Մեծ Բրիտանիայի հեղինակավոր Կուրտոլդի արվեստի ինստիտուտի հետազոտությունը ցույց է տալիս, որ երկրի դպրոցներում արվեստի պատմության դասավանդումը վերջին տարիներին զգալիորեն նվազել է, մինչդեռ մասնագետները շեշտում են, որ պատկերների և թվային միջավայրի դարաշրջանում այս առարկան առավել կարևոր է դարձել։

Հետազոտության համաձայն՝ վերջին տասնամյակում ավարտական ծրագրով արվեստի պատմություն առաջարկող դպրոցների թիվը նվազել է 34 % – ով՝ 2016 թվականի 122 – ից հասնելով ընդամենը 80 – ի։ Այդ դպրոցներից միայն 19 – ն են պետական կամ անվճար կրթություն տրամադրող ուսումնական հաստատություններ։

Միաժամանակ բարձրագույն կրթության ոլորտում Մեծ Բրիտանիան շարունակում է պահպանել առաջատար դիրքերը։ Ավելի քան 100 բրիտանական համալսարաններում դասավանդվում է արվեստի պատմություն, իսկ հեղինակավոր համաշխարհային համալսարանների վարկանիշում աշխարհի լավագույն տասնյակում ընդգրկված են այս մասնագիտությունն առաջարկող չորս բրիտանական համալսարաններ։ Առաջին տեղում է Կուրտոլդի արվեստի ինստիտուտը, իսկ լավագույնների թվում են նաև Լոնդոնի համալսարանական քոլեջը, Թագավորական արվեստի քոլեջը և Քեմբրիջի համալսարանը։

Հետազոտությունը նաև փաստում է, որ արվեստի պատմությունն այսօր դասավանդվում է միայն բրիտանական դպրոցներում, որոնց մեծ մասը կենտրոնացած է Լոնդոնում և երկրի հարավարևելյան հատվածում։ Բազմաթիվ շրջանների աշակերտներ հնարավորություն չունեն ուսումնասիրելու այդ առարկան։

Մասնագետների գնահատմամբ՝ արվեստի պատմությունը կարևոր դեր ունի ժամանակակից կրթության մեջ, քանի որ օգնում է զարգացնել պատկերների վերլուծության, քննադատական մտածողության և մշակութային գրագիտության հմտությունները։ Պատկերներով և սոցիալական ցանցերով հագեցած միջավայրում այն սովորեցնում է հասկանալ տեսողական տեղեկատվությունը, դրա մշակութային և պատմական համատեքստը։

Բացի կրթական նշանակությունից, ոլորտն ունի նաև տնտեսական մեծ ազդեցություն։ Մեծ Բրիտանիայի Լորդերի պալատի վերջին զեկույցի համաձայն՝ երաժշտության, կատարողական և տեսողական արվեստների ոլորտները երկրի տնտեսությանը տարեկան ապահովում են շուրջ 11,2 միլիարդ ֆունտ ստեռլինգ (մոտ 15,3 միլիարդ ԱՄՆ դոլար)։ Թանգարաններում, պատկերասրահներում և գրադարաններում աշխատում է շուրջ 91 հազար մարդ, իսկ Մեծ Բրիտանիայի արվեստի շուկան աշխարհում մեծությամբ երկրորդն է։

Հետազոտության հեղինակները նշում են, որ արվեստի պատմությունը միայն արվեստի գործերի ուսումնասիրություն չէ։ Այն համատեղում է պատմության, գրականության, երաժշտության, փիլիսոփայության և մշակույթի ուսումնասիրությունը՝ նպաստելով համակողմանի կրթության ձևավորմանը։