Լուսանկարը՝ yle.fi կայքից
Ֆինլանդիայի դպրոցներն այս շաբաթ վերաբացվում են նոր օրենքների և բարեփոխումների պայմաններում։ Հիմնական և ավագ դպրոցների, ինչպես նաև մասնագիտական ուսումնական հաստատությունների մեծ մասը սովորողներին կընդունի օգոստոսի 6-ից։
Այս տարվանից դպրոցներում արգելվում է սմարթֆոնների օգտագործումը դասաժամերի ընթացքում, բացառությամբ հատուկ կրթական ու առողջական կարիքների։ Նպատակն է նվազեցնել շեղումները և բարելավել կենտրոնացվածությունը։
Կառավարությունն արդեն հաստատել է շուրջ 200 միլիոն եվրոյի լրացուցիչ ֆինանսավորում՝ ուղղված կրթության որակի բարձրացմանը։ Այդ գումարի մի մասը կծախսվի անհատական աջակցություն ստացող աշակերտների խմբերի ձևավորմանը։
Նախատեսվում է առաջիկա տարիներին սահմանել նույն մակարդակի կարողություններով առավելագույնը 5 աշակերտի խումբ՝ ուսուցչի ղեկավարությամբ։
Բացի այդ, հստակեցվել է պահանջը՝ համայնքները պարտավոր են ապահովել լրացուցիչ ուսումնական ժամեր հատկապես լեզուների և մաթեմատիկայի համար։ Այս փոփոխությունների նպատակը կրթական անհավասարության հաղթահարումն ու սովորողների առաջադիմության բարձրացումն է։
2026 թվականից նախատեսվում է ներդնել անգլերեն կրթական տարբերակ՝ այն աշակերտների համար, որոնք չեն տիրապետում ֆիններենին կամ շվեդերենին։ Սա կօգնի ներգրավվել ավելի լայն շրջանակի սովորողներ՝ հատկապես միգրանտների երեխաներ։
Ֆինլանդական կրթական համակարգը, որը երկար տարիներ համարվել է համաշխարհային առաջատարներից մեկը, այս բարեփոխումներով փորձում է արձագանքել նորագույն մարտահրավերներին և ապահովել բոլորի համար հավասար կրթության հասանելիություն։
