Գերմանիայի տնտեսական ինստիտուտի «Կրթական մոնիթորինգ 2025» զեկույցի նախնական տվյալները, որոնց պաշտոնական ներկայացումը նախատեսված է սեպտեմբերի 9-ին Բեռլինում, արդեն իսկ ցույց են տալիս մտահոգիչ միտումներ։

2013 թվականից ի վեր ինտեգրման և կրթական հնարավորությունների ցուցանիշը նվազել է 43․7 միավորով, դպրոցների որակը՝ 28․2 միավորով, իսկ երեխաների կրթական աղքատությունը աճել է 26 միավորով։

Առանձնապես ուշագրավ է լեզվական խնդիրների հետ կապված տվյալը․ Գերմանիայի դպրոցների մոտ 30-40 տոկոսում աշակերտները դժվարանում են բավարարել տարրական ընթերցանության չափանիշները։ Այս խնդիրը մեծապես կապված է 2015 թվականից հետո Գերմանիա տեղափոխված փախստական և ներգաղթած երեխաների թվի աճի հետ։

Խաթարվում է նաև Գերմանիայի մասնագիտական կրթության և ուսուցման համակարգը, որը երկար տարիներ համարվել է երկրի որակյալ աշխատուժի հենասյունը։

Վերջին հարցման համաձայն՝ ընկերությունների ավելի քան քառորդը նախատեսում է 2025-ին միաժամանակ սովորելու ու աշխատելու համար նախատեսված տեղերը կրճատել, իսկ ուսուցանվողներից գրեթե յուրաքանչյուր երրորդը դադարեցնում է ուսումը՝ այն չավարտելով։ Ըստ ինստիտուտի տվյալների, եթե միտումը շարունակվի, մինչև 2028 թվականը Գերմանիան կարող է բախվել 768 հազար որակյալ մասնագետի պակասի։ 

Գերմանիայի դպրոցների վերաբերյալ հետազոտության նախնական արդյունքների անկումը համահունչ է նաև միջազգային գնահատումներին․ վերջին PISA թեստում (2022 թ.) Գերմանիան գրանցել էր իր պատմության ամենացածր ցուցանիշները մաթեմատիկայի և ընթերցանության ոլորտում՝ արձանագրելով անկում ինչպես ԵՄ միջին մակարդակի, այնպես էլ OECD երկրների միջին արդյունքների համեմատությամբ։ 

Չնայած կառավարությունը հայտարարում է հարյուրավոր միլիարդավոր եվրո ներդրումների մասին՝ կրթության և ենթակառուցվածքների արդիականացման նպատակով, փորձագետները զգուշացնում են, որ առանց անհապաղ բարեփոխումների թե՛ դպրոցները, թե՛ աշխատաշուկան շարունակելու են բարդություններ կրել։

«Կրթական մոնիթորինգ 2025»-ի պաշտոնական արդյունքները կներկայացվեն սեպտեմբերի 9-ին՝ Գերմանիայի ֆեդերալ երկրամասերի կրթական վիճակի վերաբերյալ ավելի մանրամասն տվյալներով։