Հայաստանի 1400 պետական հանրակրթական դպրոցներից անցած տարի միայն 127-ում է ներառական կրթություն կազմակերպվել: Նորաստեղծ տարածքային մանկավարժահոգեբանական կենտրոնները (ՏՄԱԿ) մասնագիտական աջակցություն են ցուցաբերել այդ դպրոցներում սովորող հատուկ կարիքներ ունեցող 11457 երեխայի, որոնցից 8046-ը՝ տղա, 3411-ը աղջիկ: Բայց մասնագետների պնդմամբ` այս թվերը չեն արտահայտում ամբողջական պատկերը:

Տվյալները ներկայացրեց Վանաձորում գործող «Լուսաստղ» ՀԿ-ն՝ ամփոփելով ԵՄ աջակցությամբ իրականացվող «Բյուջեներ քաղաքացիների համար» ծրագրի շրջանակներում կատարված հետազոտությունը:

ՀԿ-ն փաստեց, որ դեռևս կան ծնողներ, որոնք չեն գիտակցում իրենց երեխայի խնդիրները և չեն համաձայնում, որ տարածքային մանկավարժահոգեբանական կենտրոնների  մասնագետները գնահատեն երեխայի կարիքները: Այս դեպքում թե՛ մտավոր ու թե՛ ֆիզիկական հաշմանդամություն ունեցող երեխաները զրկվում են մասնագետների աջակցությունից:

Կազմակերպության նախագահ Անի Գաբրիելյանի խոսքով, այսօր էլ որոշ ընտանիքների 8, 10 տարեկան կամ ավելի մեծ երեխան երբեք տանից դուրս չի գալիս ու անգամ հարևանները նրա գոյության մասին տեղյակ չեն:

Պաշտոնական տվյալներով, հատուկ ընդհանուր կրթության ծախսերը կազմում են կրթության ոլորտի ծախսերի 0,9 %-ը, կամ 1․3 մլրդ. դրամ՝ 500 սովորողների կրթության ապահովման նպատակով, իսկ 3 300 սովորողի ընդհանուր մասնագիտական կրթության ծախսերը կազմում են կրթության ծախսերի 2․9 %՝ 3․8 մլրդ դրամ:

«Լուսաստղ» ՀԿ-ի ամփոփմամբ, 3․8 մլրդ դրամից 82 միլիոնն է նախատեսված աուտիզմ ունեցող երեխաների համար: Մինչդեռ մասնագետները պնդում են, որ հատկապես վերջին տարիներին գնալով ավելանում է հոգեխոսքային խանգարումներով ծնվողների թիվը: Այս կարգի խնդիրներով երեխաներն ավելանում են, իսկ մասնագետներն արդեն չեն հերիքում դպրոցներում ու նախակրթարաններում նրանց աջակցելու համար:

«Լուսաստղ» ՀԿ փորձագետների տվյալներով, դպրոցներում ու մանկապարտեզներում հատուկ կարիք ունեցող երեխաների 80 տոկոսը մտավոր խնդիրներ, հատկապես՝ աուտիզմ ունի: