Նոր Զելանդիայի կրթության նախարար Էրիկա Սթենֆորդը հայտարարել է, որ կառավարությունը 53 միլիոն դոլար կծախսի ուսուցիչների վկայականների վճարները հոգալու համար:

Նախարարը դպրոցներից մեկում ելույթ ունենալով՝ հայտարարել է, որ այս ծրագիրն իրականացվում է «Ազգային կուսակցության» 2023 թվականի ընտրարշավի խոստման համաձայն։

Ըստ Սթենֆորդի, հուլիսի 1-ից սկսած ուսուցիչներն իրենց վկայականները թարմացնելիս կխնայեն մինչև 550 դոլար։

Նախակրթական հաստատությունների մոտ 115 հազար ուսուցիչ առաջիկա երեք տարիներին կարող է օգտվել այս հնարավորությունից։

«Սա ընտրություններից առաջ տված մեր խոստումն էր՝ ցույց տալու, որ մենք բարձր ենք գնահատում ուսուցիչների աշխատանքը։ Վերջին 18 ամիսների ընթացքում մենք մեծ բեռ դրեցինք ուսուցիչների վրա», — տեղական լրատվամիջոցների փոխանցմամբ, ասել է Նոր Զելանդիայի կրթության նախարարը։

Կրթական կազմակերպությունները ողջունել են ուսուցիչների հոգսերը թեթևացնող կառավարական որոշումը: