Եվրոպական խորհրդարանը և ԵՄ խորհուրդը հասել են ժամանակավոր համաձայնության՝ ընդդեմ վտագնավոր խաղալիքների վաճառքի: Նոր կանոններով, արգելվելու են քիմիկատների կիրառմամբ պատրաստված խաղալիքները, որոնք կարող են առաջացնել քաղցկեղ, վնասել առողջությունը: Խաղալիքները շուկա հանելուց առաջ պետք է անցնեն անվտանգության գնահատում և ունենան թվային անձնագիր՝ QR կոդի տեսքով։

Եվրոպական հանձնաժողովի տվյալներով՝ վտանգավոր ապրանքների շարքում խաղալիքներն, ըստ վտանգավորության, զբաղեցնում են երկրորդ տեղը՝ 15%։ Առաջին տեղում են կոսմետիկ միջոցները՝ 36%, իսկ երրորդը՝ էլեկտրական սարքերն են՝ 10%։ Վտանգների մեծ մասը կապված է քիմիկատների հետ։

Եվրոպական խորհրդարանի անդամ Մարիոն Վալսմանի խոսքով՝ նոր կարգը լայն քաղաքական աջակցության է արժանացել։ Վերջնական քվեարկությունը նախատեսված է 2025 թվականի հոկտեմբերին, իսկ նոր կանոնները ուժի մեջ կմտնեն 2029-ից։