Լուսանկարը՝ Նարեկ Սարգսյանի պաշտոնական էջից
Ոստիկանները ձերբակալել են մանկապարտեզի աշխատակցին։ ՖԲ իր պաշտոնական էջում գրել է ՆԳՆ խոսնակ Նարեկ Սարգսյանը։
«ՆԳՆ ոստիկանությունում կատարված ուսումնասիրությամբ պարզվել է, որ դեպքը տեղի է ունեցել Արարատի մարզի Փոքր Վեդի գյուղի մանկապարտեզում այս տարվա մայիսին։ ՆԳՆ ոստիկանության Արարատի բաժին է հրավիրվել մանկապարտեզի տնօրենը, որից ընդունվել է հաղորդում»,- տեղեկացնում է ՆԳՆ խոսնակը։
Ըստ Նարեկ Սարգսյանի, տեսանյութում պատկերված մանկապարտեզի 45-ամյա աշխատակիցը հայտնաբերվել է Վեդիի Թումանյան փողոցում, անմիջականորեն ծագած հիմնավոր կասկածի առկայության հիմքով ձերբակալվել և կազմված փաստաթղթերով ներկայացվել ՔԿ Վեդիի քննչական բաժին։
Այսօր տարածվել էր տեսանյութ, որտեղ պատկերված էր, թե ինչպես է դաստիարակը ծեծում մանկահասակ երեխային։
ՄԻՊ գրասենյակը կոչ է արել չտարածել տեսանյութը, որպեսզի երեխայի անձնական տվյալները չնույնականացվեն։
ՀՀ ԿԳՄՍ նախարարությունը հայտարարել է, որ բռնության ցանկացած դրսևորում անհարիր է կրթական միջավայրին, և նման գործելաոճով առաջնորդվողները տեղ չունեն և չեն կարող ունենալ ուսումնական հաստատություններում, որոնցում պետք է առաջնային լինի երեխայի լավագույն շահի պաշտպանությունը։
