Տնից աշխատելու մշակույթը բացասաբար է ազդում դպրոցական հաճախելիության վրա․ հայտարարել է Մեծ Բրիտանիայի դպրոցների որակի վերահսկման մարմնի՝ Ofsted-ի ղեկավար Մարտին Օլիվերը։

«Եթե ծնողներն ամբողջ օրը տանն են, արդյո՞ք ես կցանկանայի դուրս գալ տնից ու դպրոց գնալ։ Ես գուցե նախընտրեի ասել՝ կարո՞ղ եմ մնալ ձեր հետ», – բացատրել է Times-ին հարցազրույց տված Մարտին Օլիվերը։

Վերջին տվյալներով, Մեծ Բրիտանիայում տարրական դպրոցի յուրաքանչյուր յոթերորդ աշակերտ ու պետական միջնակարգ դպրոցի յուրաքանչյուր չորրորդ աշակերտ պարբերաբար բաց է թողնում առնվազն մեկ օր՝ երկու շաբաթում։ Պետական միջնակարգ դպրոցներում 2018-19 թթ. սովորողների 13%-ը պարբերաբար բացակայում էր։ Իսկ 2022-23 թթ. այդ ցուցանիշը հասել է 24%-ի։

Բացի տնից աշխատելու գործոնից, դպրոցների որակի վերահսկման պատասխանատուի խոսքով, դպրոցական հաճախելիության նվազմանը նպաստում են նաև հոգեկան առողջության խնդիրները, անհանգստությունը, դեպրեսիան, ինչպես նաև դպրոցներում անհրաժեշտ մասնագետների՝ բուժքույրերի և մանկական հոգեբանների ֆինանսավորման պակասը։

Մինչ որոշ ընկերություններ, ինչպիսիք են JP Morgan-ը, Amazon-ը և Boots-ը, աշխատողներին պարտադրում են վերադառնալ գրասենյակներ, շատերը շարունակում են օգտագործել ճկուն աշխատանքային գրաֆիկ՝ շաբաթվա երեք կամ ավելի օր տնից աշխատելով։

Օլիվերի կարծիքով, տնից աշխատելու մշակույթը դեռ երկար ժամանակ կմնա, և դպրոցները պետք է հաղթահարեն այդ նոր իրողությունից բխող մարտահրավերները։

«Կարելի է խոստովանել, որ շատ բաներ կարելի է արդյունավետ անել էկրանների միջոցով, բայց չի կարելի ժխտել, որ երեխաների համար դպրոցի կարևորագույն առավելություններից են սոցիալականացումը, հասակակիցների ու մեծահասակների հետ շփվելը»,- ընդգծել է նա։