Հնդկաստանի դպրոցներում սմարթֆոնների կիրառությունն օրենքով արգելելու հարցի ձգձգումը հարուցել է տեղական լրատվամիջոցների դժգոհությունը:

2024-ի հոկտեմբերին Հնդկաստանի կրթական գերատեսչությունը շրջաբերականով էր տեղեկացրել, որ սովորողներինև ուսուցչական անձնակազմին արգելվում է բջջային հեռախոսներ օգտագործել դասասենյակներում, լաբորատորիաներում և գրադարաններում:

Indiatodey կայքը հիշեցնում է, որ աշխարհի 79 կրթական համակարգերում գործում են սմարթֆոնների օգտագործման սահմանափակումներ։
2023 -2024 թվականներին աշխարհի կրթակարգերի 40%-ի վերաբերյալ ընդունվել են իրավական ակտեր, որոնք արգելում են սմարթֆոնների օգտագործումը դասարաններում։ Խստացումներն աստիճանաբար խորանում են:

Օրինակ, Չինաստանում (Ցժենչժոուում) ծնողներին պարտավորեցրել են ստորագրել փաստաթուղթ, որով հաստատում են, որ իրենց երեխաները սմարթֆոնն օգտագործում են միայն կրթական նպատակներով։

ԱՄՆ 50 նահանգներից 20-ն արդեն իսկ ներդրել են սահմանափակումներ։ Կալիֆոռնիայում «Հեռախոսներից ազատ դպրոց» կարգախոսը վերածվել է օրենքի: Օհայոյում սմարթֆոնների կիրառությունը թույլատրվում է բացառապես առողջական խնդիրներ ունեցող սովորողների դեպքում։

Իսպանիայի 17 ինքնավար համայնքներից 14-ի դպրոցներում արգելված է սմարթֆոնների օգտագործումը։

Դանիայում և Ֆրանսիայում արգելված է Google Workspace-ի օգտագործումը դպրոցներում։

Գերմանիայի որոշ նահանգներում սահմանափակված են Microsoft-ի ծրագրերի օգտագործումը։

Սահմանափակումները նպատակ ունեն պահպանել ուսանողների կենտրոնացվածությունը և ապահովել նրանց անձնական տվյալների անվտանգությունը։

UNESCO-ի հետազոտությամբ էր պարզվել, որ որոշ տեխնոլոգիաներ կարող են նպաստել ուսուցման գործընթացին, բայց դրանց չափից շատ և ոչ պատշաճ օգտագործումը խանգարում է կրթական առաջընթացին։

14 երկրում կատարած հետազոտությամբ ի հայտ եկած փաստերով, դասարանում սմարթֆոնների առկայությունը ուսանողներին շեղում է և բացասական ազդեցություն ունենում ուսուցման վրա։