Կատալոնիայի խորհրդարանը միաձայն հավանություն է տվել մի օրինագծի, որով պետք է վերացնել դպրոցներից առավոտյան 7-ից մինչև երեկոյան 9-ը լսվող մարզասեր երեխաների աղմուկի սահմանաչափերը: Բարսելոնայի կրթօջախներին հարակից շենքերում բնակվողները դժգոհել էին աղմուկից, և այդ հիմքով դպրոցների խաղահրապարակները ամիսներ շարունակ փակ էին նախքան օրենսդիր մարմնի որոշումը:

Մասնագետները, սակայն, անընդունելի են համարում երեխաների աղմուկից դժգոհողների փաստարկները և հիշեցնում դպրոցականներիի ակտիվության, մարզական զվարճանքներով տարվելու կարևորության մասին:

«Խաղահրապարակները նորից կդառնան խաղահրապարակներ»,- ACN գործակալությանն ասել է Բարսելոնայի «տուժած» դպրոցներից մեկի տնօրեն Ժորդի Բարբերանը և ավելացրել. «Մենք չենք կարող համեմատել մեքենայի աղմուկը խաղահրապարակի երեխաների աղմուկի հետ»:

Բարբերանի ղեկավարած դպրոցի տարածքներից մեկը փակ է եղել 8 ամսով, երկրորդը՝ 4 ամսով։ Իսկ դասերի սկիզբն ու ավարտն ազդարարող զանգի ձայնն իջեցրել էին:

Որոշ կազմակերպություններ անգամ հայտարարել են Իսպանիայի Սահմանադրական դատարան և Եվրոպական դատարան դիմելու մտադրությունների մասին՝ անթույլատրելի որակելով դպրոցականների աղմուկի սահմանափակումների վերացման վերաբերյալ իրավական ակտի ընդունումը՝ «այլ երեխաների հաշվին»: