Բրիտանական Ստոուք-օն-Թրենթ քաղաքում հատուկ կրթական կարիքներ ունեցող երեխաների աճող թիվը տեղական իշխանությանը ստիպել է վերանայել ֆինանսավորման մոտեցումները։ BBC-ն պարզել է՝ քաղաքային խորհուրդը ծրագրում է այդ երեխաներից շատերին գալիք սեպտեմբերից ներգրավել հանրակրթական դպրոցներում՝ նվազեցնելով մասնավոր հաստատությունների վրա կատարվող մեծածավալ ծախսերը։

Քաղաքային խորհուրդը հայտնվել է 22,4 միլիոն ֆունտ ստերլինգի դեֆիցիտի (մոտ 29 միլիոն դոլար) առջև՝ կրթության ոլորտին ուղղված պետական հատուկ նպատակային հատկացումների հաշվին։ Ըստ քաղաքապետարանի հաշվետվության՝ այս բացը մինչև 2025/26 ուսումնական տարվա ավարտը կարող է հասնել 38.8 միլիոն ֆունտի (մոտ 50 միլիոն դոլար)՝ հատուկ կարիք ունեցող երեխաների թվի կտրուկ աճի հետևանքով։

Եթե 2021-ին Ստոուք-օն-Թրենթում հաշվառվել էր հատուկ կրթության, առողջության և խնամքի կարիք ունեցող 2 390 երեխա, ապա 2025-ին այդ թիվը աճել է՝ հասնելով 3 472-ի: Այս պահին միայն 34 %-ն է ուսանում հանրակրթական դպրոցում, մինչդեռ ազգային միջինը կազմում է 40 %։

Քաղաքային խորհրդի նիստում որոշում է կայացվել հատուկ կարիքին հատկացվող ֆինանսավորման մի մասն ուղղել սովորական դպրոցներին՝ նպաստելով, որ հատուկ կարիք ունեցող երեխաներն ուսումը շարունակեն տեղում։

Երեխաների հարցերով հանձնաժողովի անդամ Սառա Ջեյն Քոլքլաուն նշել է, որ նման խնդիրների առաջ կանգնած են Մեծ Բրիտանիայի մի շարք այլ համայնքներ ևս: