Ինչպես խոսել երեխաների հետ վնասակար առցանց բովանդակության շուրջ։ Այս հարցի պատասխանը տվել է Մեծ Բրիտանիայի Գիտության, նորարարության և տեխնոլոգիաների նախարարությունը՝ Յորքշիրում ու Միդլենդսում ներդնելով փորձնական ծրագիր՝ «Դու չես իմանա, քանի դեռ չես հարցրել» խորագրով։

Նախաձեռնության նպատակն է ծնողներին տրամադրել ուղեցույցներ, թե ինչպես քննարկել սոցիալական մեդիայում տարածվող մարմնի վերաբերյալ ամոթանքն ու վիրավորանքը, անթույլատրելի բովանդակությունը։

Նախաձեռնությունը մեկնարկում է այն պայմաններում, երբ կառավարության նոր ուսումնասիրությամբ պարզվել է՝ ծնողների կեսը խոստովանում է՝ երեխաների հետ չի քննարկում վնասակար առցանց բովանդակությունը։ Այս հանգամանքը ընդգծել է տեխնոլոգիաների նախարար Լիզ Քենդալը։

«Ես գիտեմ, որ շատ ծնողներ անհանգստացած են այն ամենից, ինչ իրենց երեխաները տեսնում և անում են առցանց՝ հաճախ նրանց աչքից հեռու և երբեմն իրենց վերահսկողությունից դուրս։ Մենք վճռական ենք երեխաներին ապահովել արժանի մանկություն և պատրաստել նրանց ապագային։ Այդ պատճառով ենք աջակցում ծնողներին այս քարոզարշավի միջոցով և մեկնարկում քննարկում այն մասին, թե ինչպես կարող են երիտասարդները ապրել և զարգանալ սոցիալական մեդիայի դարում»,– հայտարարել է նախարարը։

Քարոզարշավը արձագանք է ծնողների աճող պահանջին՝ արգելել մինչև 16 տարեկանների հասանելիությունը սոցիալական մեդիային։

«Աստրեա» ակադեմիայի տնօրեն Դեյվիդ Սքեյլսը BBC-ի հետ զրույցում ողջունել է կառավարության նոր նախաձեռնությունը՝ միևնույն ժամանակ նշելով, որ անհրաժեշտ են ավելի խիստ քայլեր։

«Մենք պետք է վերանայենք այն, թե ինչ տարիքից երեխաները պետք է սմարթֆոն ունենան։ Մինչև 16 տարեկանների համար պետք է լինի սոցիալական մեդիայի արգելք, իսկ դպրոցներում՝ հեռախոսների ամբողջական արգելք։ Դա հասարակության համար հստակ ազդակ կլինի, որ թեև տեխնոլոգիաներն ունեն իրենց առավելությունները, դրանք ունեն նաև լուրջ սահմանափակումների անհրաժեշտություն»,– ասել է նա։