Կանադայի Նոր Շոտլանդիա նահանգի կրթության փոխնախարար Թրեյսի Բարբրիկը նահանգային օրենսդիր մարմնի մարդկային ռեսուրսների հանձնաժողովի նիստի ժամանակ հայտարարել է, որ վերանայվում է ուսուցիչների պատրաստման, աշխատանքի երաշխավորման քաղաքականությունը։ Ըստ փոխնախարարի՝ ներկա քաղաքականությունը վտանգում է ուսուցիչների աշխատանքի կայունությունը մասնագիտական գործունեության երկրորդ տարում։ Նա հիշեցրել է, որ քաղաքականությունը ներդրվել էր մոտ երեք տարի առաջ, երբ նահանգը «ծայրահեղ կարիք ուներ լրացուցիչ ուսուցիչների»։ Այդ ժամանակ փոխարինող ուսուցիչների ցանկը շատ սահմանափակ էր։

«Երեք տարի առաջ պայմանները բոլորովին այլ էին, քան այսօր, ուստի անհրաժեշտ է համոզվել, որ քաղաքականությունը համահունչ է ներկայիս կարիքներին»,- նշել է Բարբրիկը։

Վարչապետի ձախողված խոստումը

Ուսուցիչների աշխատանքի խոստման քաղաքականության «կնքահայրը» վարչապետ Թիմ Հյուսթոնն էր։ Նա միաժամանակ առաջարկել էր թույլատրել ուսուցչական ծրագրեր ընդունվել նաև առանց բակալավրի աստիճանի։ Վերջին նախաձեռնությունը, սակայն, չի իրականացվել՝ մասամբ ուսուցիչների արհմիության անհամաձայնության պատճառով։

Ուսուցիչների ձայնը

Նոր Շոտլանդիայի ուսուցիչների միության նախագահ Փիթեր Դեյը նշել է, որ խնդիրներ են ստեղծվել ոչ միայն նոր ուսուցիչների երկրորդ տարվա աշխատանքի հարցում, այլև այն դեպքերում, երբ համակարգում արդեն աշխատող մասնագետներն անտեսվել են՝ հօգուտ նոր շրջանավարտների։

Քաղաքական աջակցություն

Խնդիրը բարձրաձայնել էր նաև լիբերալների ժամանակավոր առաջնորդ Իեն Ռանկինը։ «Սովորական քաղաքացու համար սա նշանակում է կայուն աշխատանք և կարիերա, ոչ թե մեկ տարվա աշխատանք, որից հետո վտանգի տակ է հայտնվում զբաղվածությունը»,- նշել է Ռանկինը։

Հանձնաժողովի նիստի ընթացքում նշվել է, որ վերջին տարիներին բնակչության աճը, որն առաջացրել էր ուսուցիչների պակաս, այժմ դանդաղել է։ Այս համատեքստում կրթության նախարարությունը սկսել է տվյալների հավաքագրում՝ կրթական համակարգում ապագա կարիքները ավելի ճշգրիտ գնահատելու նպատակով։

Պահանջ

Ուսուցիչների միությունը կոչ է արել մշակել համալիր հավաքագրման և պահպանման ռազմավարություն, որը կհստակեցնի՝ ինչպես են մարդիկ մուտք գործում կրթական համակարգ և ինչ պայմաններում կարողանում են այնտեղ երկարաժամկետ աշխատել։

Կառավարություն–արհմիություն համատեղ աշխատանքային խումբն արդեն մշակել է մի շարք առաջարկություններ՝ ուղղված հավաքագրմանը և պահպանմանը։ Սակայն, ըստ փոխնախարարի, փաստաթուղթը հանրայնացնելու մտադրություն, նրա խոսքով, չի եղել։

Հանրության տեղեկացվածությունը

Այս մոտեցումը քննադատել է Նոր ժողովրդավարական կուսակցության կրթության հարցերով քննադատ, պատգամավոր Փոլ Վոզնին՝ ընդգծելով, որ հասարակությունը պետք է տեղեկացված լինի այն ընդհանուր նպատակների մասին, որոնց շուրջ կառավարությունն ու արհմիություն համագործակցում են։ Վոզնիի խոսքով՝ հստակ ռազմավարության և տվյալների ավելի լայն հավաքագրման բացակայությունը կարող է հանգեցնել կրթական համակարգում նախկինում արդեն արձանագրված աշխատաշուկայի խնդիրների կրկնությանը։