Տնային ուսուցման գործընթացի իրականացման փաստացի վիճակը պարզելու նպատակով ՀՀ կրթության տեսչական մարմինը Երևանի և մարզերի դպրոցներում հարուցված վարույթների արդյունքում հայտնաբերել է մի շարք խախտումներ։ Հայտնում է Կրթության տեսչական մարմինը։

Վարչական վարույթների ընթացքում արձանագրվել է, որ չեն պահպանվում տնային ուսուցման գործընթացը կարգավորող օրենսդրության մի շարք պահանջներ։

Տեսչական մարմինը հիշեցնում է, որ տնային ուսուցման գործընթացում կարևոր է իմանալ, որ սովորողների համար տնային ուսուցումը պետք է կազմակերպի այն ուսումնական հաստատությունը, որտեղ հաշվառված է սովորողը: Այն կարող է իրականացվել նաև հեռավար ուսուցման ձևով:

Տնային պայմաններում ուսուցում կազմակերպվում է բժշկական հաստատության տված համապատասխան տեղեկանքի հիման վրա։

Տնային ուսուցում կազմակերպվում է Կառավարության համապատասխան որոշմամբ տնային ուսուցման իրավունք վերապահող հիվանդությունների դեպքում։

Կրթության առանձնահատուկ պայմանների կարիք ունեցող սովորողների (բացառությամբ ինտելեկտուալ (մտավոր) հետամնացություն ունեցող սովորողների), ինչպես նաև տնային և հիվանդանոցային պայմաններում երկարատև բուժվող սովորողների անհատական ուսուցումն իրականացվում է` «Տնային և հիվանդանոցային պայմաններում երկարատև բուժվող սովորողների անհատական ուսուցման ուսումնական պլան»-ով:

Օրեսնդրության պահանջների խախտումները ենթակա են սահմանված կարգով վերացման։