Շվեդիայի կառավարությունը հստակ ուղերձ է հղում կրթական աշխարհին․ ժամանակն է վերադառնալ ուսուցման բուն էությանը՝ գրքին, ընթերցանությանը և մտածողությանը: Իրականացվում են մի շարք ռազմավարական փոփոխություններ՝ ուղղված ընթերցանության խթանմանը և թվային միջոցների չափավոր կիրառմանը դպրոցներում։

«Ընթերցանության և գրելու հիմնական հմտությունները լավագույնս զարգանում են ավանդական (ոչ թվային) կրթական միջավայրում։ Այդ պատճառով չափազանց կարևոր է, որ աշակերտներն աշխատեն գրիչով ու թղթով, ունենան դասագրքեր և լիարժեք գրադարաններ», — նշել է Շվեդիայի դպրոցական կրթության նախարար Լոտտա Էդհոլմը։

Կառավարությունն արդեն նախաձեռնել է ծրագիր, որի նպատակն է յուրաքանչյուր աշակերտին ապահովել առնվազն մեկ դասագրքով յուրաքանչյուր առարկայի համար։ 2023–2025 թվականներին այդ նպատակով հատկացվել է շուրջ 2 միլիարդ շվեդական կրոն, իսկ 2024-ի հուլիսից օրենքով ամրագրվել է՝ դասագրքերը պետք է հասանելի լինեն բոլորի համար։

Միևնույն ժամանակ, շեշտը դրվում է դպրոցական գրադարանների վերակազմակերպման վրա․ 2025 թվականի սեպտեմբերից բոլոր դպրոցները պարտավոր կլինեն ունենալ գրադարան՝ գրադարանավարներով։

Կրթության նախարարությունը նաև մշակել է օրենսդրական առաջարկ, որի նպատակն է սահմանափակել բջջային հեռախոսների օգտագործումը դպրոցական միջավայրում՝ աշակերտների ուշադրության և մտավոր կենտրոնացման բարենպաստ պայմանների ապահովման համար։

Շվեդիայի այս նոր կրթական քաղաքականությունը հնչում է որպես հակադարձ ազդակ համաշխարհային թվայնացման միտումներին։ Այն վերացնում է թվային գերհագեցվածությունը և կրթությանը վերադարձնում իր ամենամարդկային՝ մտածողության, զգացմունքի ու փոխգործակցության հիմքերը։

Նախաձեռնությունների հիմքում է պետական խոր համոզմունքը՝ կրթությունը չի կարող և չպետք է կորցնի մարդկային շփման ու ընկալման խորությունը՝ թվային տեխնոլոգիաների զարգացման պայմաններում։