ՀՀ ԿԳՄՍ նախարար Ժաննա Անդրեասյանն ընդունել է «Դասավանդի՛ր հանուն Հայաստանի» ծրագրի 11-րդ սերնդի ուսուցիչ-առաջնորդներին։

Ըստ ԿԳՄՍ հաղորդագրության, ծրագրի մասնակիցներն ավարտել են ուսուցիչների առաջնորդության ակադեմիան (7-շաբաթյա վերապատրաստման ծրագրով), ստացել են 30 կրեդիտի հավաստագրերը և տեղափոխվել մարզեր՝ որպես ուսուցիչ աշխատելու նպատակով:

Նախարարը կարևորել է հիմնադրամի հետ համագործակցությունը՝ ընդգծելով, որ այն նպաստում է ուսուցիչների ներգրավմանը, դասավանդման գործընթացի արդյունավետ կազմակերպմանը և նոր մոտեցումների տարածմանը։

«Շատ հաճախ ձեր ներկայությունը դառնում է այնպիսի փոփոխությունների մեկնարկ, որոնք շարունակվում են նաև ձեր հեռանալուց հետո: Տարվա ավարտին ձեր աշխատանքի արդյունքը կտեսնեք երեխաների աչքերում, իսկ դա ամենաթանկ պարգևն է ուսուցչի համար», – հյուրերին ասել է նախարարը:

Ժաննա Անդրեասյանը կարևորել է նաև ուսուցիչների առաջարկները և դիտարկումները պետական կրթական քաղաքականության կատարելագործման գործում՝ կոչ անելով ակտիվորեն օգտվել նաև պետության ընձեռած հնարավորություններից՝ մասնակցելով կամավոր ատեստավորմանը, որը հնարավորություն կտա բարձրացնելու վարձատրությունը։

Նախարարն առանձնացրել է ուսուցիչնե ինքնավարության սկզբունքը․ «Մենք ցանկանում ենք, որ դպրոցները լինեն նախաձեռնող և ունենան կարողություններ՝ հարցերը քննարկելու, որոշումներ կայացնելու համար։ Կարևորում ենք մանկավարժական ինքնավարության զարգացումը, որպեսզի մեր ուսուցիչները հստակ իմանան իրենց իրավունքները և ունենան ազատություն՝ որոշելու դասագրքի ընտրությունը, կիրառվող մեթոդները, դասերի պլանավորումն ու մյուս բոլոր մանկավարժական հարցերը։ Միևնույն ժամանակ անհրաժեշտ է նաև պատրաստակամություն՝ սովորելու միմյանցից, կիսվելու փորձով և միասին ձևավորելու առողջ ու համագործակցային միջավայր»։

Ժաննա Անդրեասյանը վստահություն է հայտնել, որ «առաջնորդությունն այն առանցքային հմտություններից է, որը պետք է ձևավորել ուսուցիչների և տնօրենների շրջանում՝ մանկավարժական ինքնավարության լիարժեք իրականացման համար»։