Ռումինիայի կրթության ոլորտի արհմիությունները պահանջեւմ են կրթության նախարար Դանիել Դավիդի հրաժարականը։ Ուսուցիչները բողոքի ակցիաներ են նախաձեռնել կրթության նախարարության շենքի առջև։

«Այդ փոփոխությունները բազմաթիվ դպրոցներում կհանգեցնեն ամբողջ դրույքով աշխատող ուսուցիչների կրճատման, իսկ փոխարինող մասնագետները հավանաբար չեն կարողանա աշխատանք գտնել։ Ամբողջ դրույքով աշխատողների համար նույնպես մեծ է ռիսկը, որ չեն կարողանա ստանալ իրենց ամբողջական աշխատավարձը, քանի որ 20-ժամյա բեռնվածությունն ապահովելը գրեթե անհնար կլինի», – նախազգուշացնում են արհմիությունները, որոնք դժգոհ են նաև դասարանում սովորողների քանակն ավելացնելուց։

Ակցիայի մասնակիցները վարչապետ Իլիե Բոլոժանին մեղադրում են վերջին 35 տարվա ընթացքում կրթական համակարգի ամենածանր ճգնաժամը ստեղծելու մեջ։ Նաև դժգոհություն են հայտնել նախագահ Նիկուշոր Դանի «կասկածելի լռության» կապակցությամբ։

«Կրթության համակարգը բարդ ոլորտ է, իսկ ուսուցիչները՝ մարդկային ռեսուրսներ, ոչ թե ցուցակային միավորներ։ Նրանց նվաստացնելն ու անտեսելն անթույլատրելի է», – նշված է արհմիությունների համատեղ հայտարարության մեջ։

Օրերս արհմիությունները բաց նամակ էին հղել նախագահ Նիկուշոր Դանին՝ կոչ անելով չհաստատել բյուջետային դեֆիցիտը նվազեցնելու նպատակով մշակված ֆինանսական միջոցառումների փաթեթը, որն ուժի մեջ կմտնի օգոստոսի 1-ից։

Արհիմիությունները խոստանում են Բուխարեստում սեպտեմբերի 1-ին շարունակել ակցիան՝ արդեն 30 000 մասնակիցներով։