Սուսաննա Դավթյան

Կրթության միջոցով մարդկային կյանքը վերափոխելը էական եմ համարում, հետևաբար, կրթության բովանդակությունն ու որակը` առաջնային։ ՔՈԱՖ-ում ղեկավարելով լոգոպեդական, ներառական ծրագրեր և սերտորեն աշխատելով գյուղական համայնքների հետ՝ հնարավորություն ունեցա ավելի ամբողջական ճանաչելու մեր մարզերի առավելություններն ու խնդիրները։ Ավելի ուշ, երբ ԿԳՄՍ նախարարության պատվերով մենթորական ծրագրի շրջանակում ուսուցիչների վերապատրաստումներ էի իրականացնում Երևանի մի շարք հանրակրթական դպրոցներում, ակնհայտ ընդգծվեց կրթական համակարգի համընդհանուր կոլապսը, այն իներցիան, ընդդեմ որի անհավասար ջանք են սպառում հատուկենտ ուսուցիչներ՝ երբեմն հաջողելով լուծել միայն տեղային առօրեական խնդիրներ։ Որպես շուրջ քսանամյա պրակտիկ փորձով լոգոպեդ և հատուկ մանկավարժ՝ յուրաքանչյուր անհատական պլան կազմելիս և նպատակներ սահմանելիս նկատի եմ ունենում հեռանկարային ազդեցությունն ու արդյունավետությունը անձի կյանքի գալիք փուլերում։ Նույն կերպ մեր կրթական համակարգի ուղեծրում կարևոր եմ համարում տասնամյակների, դարերի հեռուն գնացող մեծ նպատակներ ու ոգեղեն երազանքներ կերտելը և դրանց իրագործումը ձեռնարկելը։ Գաղափարակիր ընկերների հետ հնարավոր է ստեղծել կրթական միջավայր, ուր ավելի ու ավելի շատ կձևավորվեն ձգտող ու կարող մարդիկ, ովքեր շարունակաբար կզարգանան ու կառաջնորդեն դեպի լույսը։ ․․․Մենք ուխտ ունենք՝ միշտ դեպի լույս․․․