Ռուսական դատարանը դռնփակ նիստում երեք ամսով երկարաձգել է The Wall Street Journal-ի 32-ամյա թղթակից Էվան Գերշկովիչի կալանքը։ Նա առաջին լրագրողն է, որը Ռուսաստանում լրտեսության մեղանդրանքով քրեական հետապնդման է ենթարկվում սառը պատերազմից ի վեր։ Գերշկովիչը մոսկովյան Լեֆորտովոյի բանտում է անցյալ տարվա մարտի 29-ից։

ԱՄՆ կառավարությունը հերքել է ռուսական կողմի պնդումները, թե Գերշկովիչը լրտես է։

ՌԴ-ում ԱՄՆ դեսպան Լին Թրեյսին ասել է, որ տվյալ դեպքում խոսքը ոչ թե քրեական հանցագործության, օրենքը խախտելու մասին է, այլ լրագրողին որպես պատանդ վերցնելով՝ քաղաքական հարց լուծելն է։

The Wall Street Journal պարբերականը հայտարարել է, որ լրագրողը ռուսական բանտում է հայտնվել միայն ու միայն իր աշխատանքը կատարելու համար։ «Նա չպետք է կալնավորվեր։ Լրագրությունը հանցագործություն չէ և մենք պահանջում ենք նրան անհապաղ ազատ արձակել»,- պնդել էThe Wall Street Journal պարբերականը։