Լուսանկարը՝ Էնթոնի Ալբանեսի պաշտոնական կայքից
Գուգլն ու Մետան Ավստրալիային հորդորում են չեղարկել անչափահասների սոցցանցային հասանելիությունը սահմանափակող օրինագիծը, որն անցյալ շաբաթ մեկ օրում քննարկվել է խորհրդարանում։ Հաղորդում է Ռոյթերս լրատվական գործակալությունը։
Վարչապետ Էնթոնի Ալբանեսի ձախ կենտրոնամետ կառավարությունը մտադիր է կոշտ վերահսկողություն սահմանել անչափահասների սոցցանցային ակտիվության տիրույթում։
Գուգլն ու Մետան պնդում են, որ կառավարությունը սպասի տարիքային սահմանափակման հնարավորությունների փորձարկման արդյունքներին։
Օգտատերերի տարիքի ստուգման համակարգը կարող է ներառել կենսաչափական կամ պետական նույնականացում՝ սոցիալական մեդիայի տարիքային սահմանափակում կիրառելու համար:
«Նման արդյունքների բացակայության դեպքում ոչ ընկերությունները, ոչ էլ ավստրալացիները չեն հասկանա օրինագծով պահանջվող տարիքի ապահովման բնույթը կամ մասշտաբը, ոչ էլ նման միջոցների ազդեցությունը ավստրալացիների վրա», – հայտարարել է Մետան:
Օրինագծի հաստատման դեպքում Գուգլն ու Մետան ստիպված կլինեն ներդնել 32 մլն դոլար ավստրալացիների տարիքի ստուգման համակարգի անխափան գործունեության համար։
