Լուսանկարը՝ The Wall Street Journal-ի կայքից
Ավստրալիան մտադիր է սահմանել նվազագույն տարիքի շեմ՝ սոցիալական ցանցերից օգտվելու հարցում: Նման որոշման հիմքում սոցցանցերի բացասական ազդեցությունն է երեխաների հոգեկան և ֆիզիկական առողջության վրա, որն առաջացնում է հակազդեցություն օնլայն հարթակների պատասխանատուների շրջանում, քանի որ այդպիսով կկրճատվի ակտիվությունը սոցցանցերում: Տեղեկացնում է Reuters լրատվական գործակալությունը:
Ավստրալիայի վարչապետ Էնթընի Ալբանեսը հայտարարել է, որ իր ղեկավարած կառավարությունն այս տարի իրավական ակտով կսահմանի սոցցանցերից օգտվողների նվազագույն տարիքի շեմը: Նա ասել է, որ խոսքը 14-16 տարեկանների մասին է:
«Ես ուզում եմ երեխաներին տեսնել ֆուտբոլի դաշտում և լողավազանում ու թենիսի կորտում»,- հայտարարել է վարչապետը և ավելացրել. «Մենք ուզում ենք, որ մեր երեխաներն ունենան իրական շփումներ իրական մարդկանց հետ: Բոլորս գիտենք, որ սոցիալական մեդիան պատճառում է սոցիալական վնասներ»:
Ավստրալիան սոցցանցերում ամենաակտիվ երկրներից է. պաշտոնական տվյալներով, 26 մլն ավստրալացի է գրանցված տարբեր սոցիալական հարթակներում:
Ավստրալիայի թվային անվտանգության հանձնակատարը հունիսին զգուշացրել էր, որ սահմանափակումները կարող են երեխաներին մղել դեպի ավելի ցածրակարգ սոցիալական տիրույթներ: Սիդնեյի համալսարանի տվյալներով, դեռահասներն առավելապես տարված են Instagram-ով և Youtube-ով:
