Այսօր, երբ մենք նշում ենք մամուլի միջազգային օրը, պետք է խորհենք, որ սա առավելություն չէ, մարդու իրավունք է,- Մամուլի միջազգային օրվա կապակցությամբ «Օպերա սուիթ» հյուրանոցում հայտարարեց ՀՀ-ում ԵՄ պատվիրակության ղեկավար, դեսպան Վասիլիս Մարագոսը։

«Մեդիայի որակի և դիմակայունության նախաձեռնություն» ծրագրի շրջանակներում մասնագիտական համայնքի հետ հանդիպմանը հրավիրված դեսպանն ասաց, որ ԵՄ-ն Հայաստանի հետ նոր գործընկերության օրակարգ է մշակում։

«Մեր հույսը ձեր վրա է, որ այս առաջնահերթությունը կոնկրետ արդյունք ապահովի Հայաստանի համար։ Պրոֆեսիոնալ, բազմակարծ մամուլի միջավայրը շատ կարևոր նախադրյալ է ցանկացած երկրի դիմակայության համար»,- հայտարարեց Վասիլիս Մարագոսը։

Պարոն դեսպանն ավելացրեց. «Ինքնակազմակերպումն ավելի մեծ է դարձնում վստահությունը լրատվամիջոցների նկատմամբ։ Մասնագիտական ստանդարտները շատ են. դա տեղեկատվությունը ճշտված տարածելն է, նաեւ էթիկան, պայքարը կոռուպցիայի դեմ»։

«Մեդիայի որակի և դիմակայունության նախաձեռնություն» ծրագիրը իրականացնում է Մեդիա նախաձեռնությունների կենտրոնը՝ Երեւանի մամուլի ակումբի, Բազմակողմանի տեղեկատվության ինստիտուտի, «Միջազգային մեդիա աջակցություն» (IMS) կազմակերպության հետ համատեղ՝ Եվրոպական միության ֆինանսավորմամբ։