«Անընդունելի է, որ սովորողների 25 տոկոսը չի կարողանում հաղթահարել առաջադրանքների 50 տոկոսը»,- անդրադառնալով հանրակրթության խնդիրներին՝ գնահատել է Առևտրի և արդյունաբերության պալատի գլխավոր տնօրեն Մեիթ Պալցը:

Պաշտոնական տվյալներով՝ 17 390 ուսուցիչների 22 տոկոսը չունի համապատասխան որակավորում։

Կրթությունը կապելով երկրի տնտեսության հետ՝ Պալցը պնդել է՝ եթե յուրաքանչյուր չորրորդ աշակերտ չի տիրապետում տարրական մաթեմատիկային, ապա անհնար է պատկերացնել, թե երկիրն ինչպես կարող է ունենալ ինժեներ, բժիշկ կամ ուսուցիչ։

Էստոնիայի Առևտրի և արդյունաբերության պալատի գլխավոր տնօրենը առաջնահերթ է համարել բարձր որակի, ամբողջական կրթությամբ ապահովելը։ «Միայն այս ճանապարհով կարող ենք ունենալ խելացի, նախաձեռնող և հաջողակ սերունդ, որը Էստոնիային կօգնի դառնալ նորարար ու հաջողակ երկիր»,- ասել է Պալցը։