Ֆրանսիայի կառավարությունը նախատեսում է ուժեղացնել դպրոցներում սմարթֆոնների օգտագործման նկատմամբ կիրառվող սահմանափակումները՝ «թվային դադար» ծրագիրը տարածելով բոլոր միջնակարգ դպրոցներում։ Այդ ծրագիրը փորձարկվել է վերջին վեց ամսում շուրջ 100 դպրոցում. աշակերտներն առավոտյան իրենց հեռախոսները դրել են պահարաններում կամ հատուկ փակվող պատյաններում՝ բացառապես դպրոցից դուրս գալիս վերցնելու հնարավորությամբ։

Կրթության նախարար Էլիզաբեթ Բորնը խորհրդարանում հայտնել է, որ փորձնական ծրագրի արձագանքները դրական են․ ավելացել է սոցիալական շփումը, նաև՝ ֆիզիկական ակտիվությունը, նվազել է բուլլինգը: Իսկ աշակերտների ուշադրությունը բարելավվել է։ Ծնողներն ու ուսուցիչներն, ըստ Ֆրանսիայի կրթության նախարարի, հիմնականում աջակցում են նախաձեռնությանը։

Ֆրանսիայի ազգային գրքի խորհրդի հետազոտությամբ պարզվել է՝ պատանիներն օրական միջինում հինգ ժամ են անցկացնում էկրանների առջև և միայն երեք ժամ՝ շաբաթական ընթերցանությամբ։ Նախարար Բորնը պնդել է. «Սա բացասաբար է ազդում սովորողների հաջողության վրա»:

Ֆրանսիայի նախագահ Էմանուել Մակրոնի հանձնարարությամբ կազմված գիտական զեկույցում առաջարկվում է երեխաներին 13 տարեկանից շուտ չտրամադրել սմարթֆոններ և 18 տարեկանից առաջ արգելել հասանելիությունը սոցիալական ցանցերին, ինչպիսիք են TikTok-ը, Instagram-ը և Snapchat-ը։

Մեծ Բրիտանիայում ևս խստացնում են նման սահմանափակումների պահանջները: Ուսուցիչների ամենաազդեցիկ միության առաջարկն է՝ սմարթֆոնների օրենսդրական արգելք դպրոցներում։ Հարցմամբ պարզվել է, որ արդեն իսկմիջնակարգ դպրոցների 90% -ում և կրտսեր դպրոցների 99.8% -ում կա սմարթֆոնների կիրառմաբ արգելք։