Դպրոցականների ամենօրյա տնային աշխատանքների հանձնարարության վերաբերյալ դպրոցի մոտեցումն անցած 80 տարիներին չի փոխվել, իսկ դրա վերաբերյալ ընկալումն էականորեն է փոխվել։ Այս եզրակացությունն են արել Լոնդոնի բրիտանական Քինգ քոլեջի հետազոտողները, որոնք այսօրվա դպրոցականների տնային հանձնարարություններն ու դրանց առնչությամբ վերաբերմունքը համեմատել են 1930-1940 թվականների տնայինների հետ։

Եթե 1937-ին 10 չափահաս մարդուց 8-ը համաձայն էր, որ տնային աշխատանքներ պետք չեն, հիմա, ըստ բրիտանական հետազոտության, միանգամայն հակառակ պատկերն է. 10-ից 8 չափահաս մարդ համաձայն է, տնային աշխատանքը պարտադիր է երեխաների համար։ Տվյալներն ամփոփել է բրիտանական Guardian պարբերականը։

Բրիտանացի հետազոտողները հիշեցնում են, որ 80 տարի առաջ հարցումներին մասնակից ծնողների 24%-ն էր ասել, թե տանն առհասարակ չեն օգնում երեխաների տնային աշխատանքների կատարմանը։ Իսկ հիմա, ըստ հարցման, միայն 4%-ն է ասել, որ երեխաներն ինքնուրույն են կատարում տնային աշխատանքները։

Բրիտանիայի ազգային վիճակագրական ծառայության տվյալներով, 2024 թվականին կանայք օրական միջինը 3.5 ժամ են հատկացնում երեխաների տնայինների վերահսկողության համար կամ միջինը 57 րոպեով ավելի, քան տղամարդիկ։

Բրիտանական քաղաքականության ինստիտուտի տնօրեն Բոբ Դուֆին գնահատել է. «Երեխաների տնային աշխատանքների առնչությամբ ընկալումը փաստում է՝ 80 տարվա կտրվածքով էականորեն խորացել է ընկալումը, որ կրթությունը ապագայի հաջողության գրավականն է»։