Երևանի Չայկովսկու անվան երաժշտական դպրոցի սան, ավելի քան 20 միջազգային մրցույթների դափնեկիր դաշնակահար Էդուարդ Արևշատյանը մասնակցում է Իտալիայում անցկացվող Arte Piano դաշնակահարների 5-րդ միջազգային մրցույթին, որի առաջին փուլն առցանց է:

Աշխարհի տարբեր երկրներից միջազգային մրցույթին մասնակցող 78 երաժիշտներից Էդուարդը միակն է, որ ներկայացնում է Հայաստանը: Նա հանդես է գալիս երաժիշտների ավագ խմբում (16-25 տարեկաններ): Այսօր բացվել է նաև հանդիսատեսի քվեարկության հնարավորությունը, որը հասանելի է մինչև մայիսի 18-ը ներառյալ: Մրցույթի առաջին փուլի կանոնն է դիտել երաժիշտի կատարումը և հավանություն տալ: Եզրափակիչ մասը նախատեսվում է անցկացնել Իտալիայում:

Էդուարդ Արևշատյանը Maestro Magazine մասնագիտացված երաժշտական ամսագրին վերջերս տված հարցազրույցում երաժշտությունը բնորոշել է ոչ միայն որպես ինքնարտահայտման միջոց, այլև տարածք, որտեղ դրսևորվում է իր ամբողջ էությամբ. «որտեղ ես իսկապես կարող եմ լինել ես»։ Էդուարդը հեղինակավոր մշակութային ամսագրի հետ զրույցում նաև ասել է, որ երաժշտությանը լիովին նվիրվելու որոշումը կայացրել է  աստիճանաբար՝ գիտակցելով, որ դա իր բնատուր լեզուն է։

Երաժիշտը մրցույթներին վերաբերում է ոչ թե որպես հաղթանակի միջոց, այլ ուրիշներին լսելու, երաժշտական ընկալումներ փոխանակելու, սովորականից այն կողմ ընկալման սահմաններն ընդլայնելու հնարավորություն: Էդուարդ Արևշատյանը միջազգային երաժշտական ամսագրին տված հարցազրույցում նաև ընդգծել է, որ երաժշտությունը միայն անձնական փորձ չէ, այլ երկխոսություն աշխարհի հետ։