Լուսանկարը՝ ՄՀԿ-ի
Հանրակրթության պետական չափորոշչի (ՀՊՉ) ներդրմանը հաջորդած ուսումնական տարվա ընթացքում ստուգումների և դրանից 3 տարի անց դպրոցներում անցկացված ստուգումների արդյունքների համեմատությունը վկայում է, որ հայերենի իմացության աստիճանը նվազել է 27․2 % – ով։
Այսպես՝ 2022 թվականին ՀՀ Կրթության տեսչական մարմնի հաշվետվության մեջ նշված է, որ ստուգումների շրջանակում սովորողներին տրված թելադրության միջին արդյունքը հայոց լեզվից եղել է 5.9 («բավարար») միավոր։ Հայոց լեզվի թելադրությանը մասնակցած 2080 սովորողներից «գերազանց» են գնահատվել 327-ը (15.7%), «լավ»՝ 710-ը (34.2%), «բավարար»՝ 568-ը (27.3%), «անբավարար»՝ 475 (22.8%):
2025 թվականին միջին գնահատականը հայոց լեզվի թելադրությունից կազմել է 4.3 միավոր։
Թելադրությանը մասնակցած 3548 սովորողներից «գերազանց» է գնահատվել 4.9%-ը, «լավ»՝ 18.7%-ը, «բավարար»՝ 30.8%-ը, «անբավարար»՝ 45.6%-ը:
Ըստ Կրթության տեսչական մարմնի 2025 թ․ տարեկան հաշվետվության, «Ստուգումների ընթացքում տրված գրավոր աշխատանքների և նույն սովորողների տարեկան միջին գնահատականները համադրելի չեն թե՛ «Հայոց լեզու», թե՛ «Մաթեմատիկա» առարկաների դեպքում»:
Ի դեպ, 2022–ին «բավարար» էր նաև մաթեմատիկայի միջին (4.2) միավորը։ 2025–ին այն կազմել է 4 միավոր:
